کراچی: پولیس چیف غلام قادر تھیبو کا کہنا ہے کہ ڈاکیارڈ حملے کی تحقیقات نیوی حکام کر رہے ہیں مدد مانگی گئی تو کریں گے، ڈاکٹر شکیل اوج قتل کیس کی تحقیقات جاری ہیں۔
ایڈیشنل آئی جی کراچی غلام قادر تھیبو نے امن و امان سے متعلق میڈیا بریفنگ میں بتایا ہے کہ عیدِ قربان پر ضابطہٗ اخلاق پر سختی سے عمل درآمد کرایا جائے گا، ضرورت پڑنے پرڈبل سواری پرپابندی زیرِغور ہے۔
پولیس چیف نے بتایا کہ ڈاکیارڈ حملے کی تحقیقات خود نیوی حکام کر رہے ہیں، ڈاکٹرشکیل اوج قتل کیس سے متعلق غلام قادر تھیبو نے بتایا کہ بعض مشتبہ افراد کو شامل تفتیش کیا گیا تھا، شواہد ملے ہیں، جلد ملزمان گرفتارکرلیں گے۔
غلام قادر تھیبو نے بتایا کہ ویسٹ زون پولیس نے سیاسی کارکنان اور پولیس اہلکاروں کے قتل میں ملوث پانچ ٹارگٹ کلرزکوگرفتار کیا ہے۔
اُن کا کہنا تھا کہ رواں سال اب تک ایک سو بیس پولیس اہلکار دہشت گردی کا نشانہ بنے جبکہ دوسو ٹارگٹ کلرز مقابلوں کے دوران مارے گئے، اورسینکڑوں گرفتارہوئے ہیں۔
