کراچی کے علاقے لیاری میں دو مختلف گروپوں میں تصادم کے نتیجے میں دو افراد جاں بحق اور متعدد زخمی ہوگئے۔ علاقے میں خوف و ہراس پھیل گیا جبکہ علاقہ مکین گھروں میں محصور ہو کر رہ گئے۔
کراچی کے علاقہ لیاری آج پھر میدان جنگ بن گیا، علاقے میں گولیوں تڑتڑاہٹ اور بم دھماکوں کی گونج نے علاقے میں خوف کی فضا طاری کر دی۔
آج صبح سویرے لیاری کے علاقے رانگی واڑہ میں دو گروپوں میں تصادم کے نتیجے میں متعدد افراد زخمی ہوگئے، جس کے بعد لیاری کے مختلف علاقے فائرنگ سے گونج اٹھے، علاقے میں کشیدگی کی وجہ سے علاقہ مکین گھروں میں محصور ہو کر رہ گئے۔
لیاری کے علاقے جھٹ پٹ مارکیٹ میں بھی نامعلوم افراد نے دستی بم حملہ کیا، جس کے نتیجے میں کینگ وار کا اہم ملزم ملا نثار کے زخمی ہونے کے اطلاعات ہیں، کلا کوٹ اور لیاری جنرل اسپتال کے اطراف میں بھی فائرنگ کا سلسلہ جاری ہے جبکہ قانون نافذ کرنے والے اداروں کے اہلکار ابھی تک ان علاقوں میں داخل نہیں ہوسکے۔
لیاری کے علاقے میوہ شاہ سے ایک شخص کے تشدد زدہ لاش ملی ہے، دوسری جانب رینجرز اور پولیس نے رات گئے شہر کے مختلف علاقوں میں سرچ آپریشن کے دوران متعدد افراد کو گرفتار کرلیا۔
