لاہور: پاکستان عومی تحریک کے سربراہ ڈاکٹر طاہرالقادری نے اے آروائی نیوز سے خصوصی گفتگو کرتے ہوئے کہا ہے کہ ہماری گاڑیاں بجبر روک لی گئی ہیں نہیں معلوم ہم کتنے دن میں اسلام آباد پہنچیں گے۔
ان کا کہنا تھا کہ آج ہردیکھنے والا یہ کہہ رہا ہے کہ پاکستان کی تاریخ میں اتنا بڑا مارچ کبھی نہیں ہوا، سات گھنٹے میں عوام ماڈل ٹاؤن سےمال روڈ تک نہیں پہنچ پائے ہیں۔
انہوں نے کہا کہ پنجاب حکومت نے ہماری بکنگ والی بسوں کوروک رکھا ہے اڈے بند سیل کردئے ہیں اور پیٹرول پمپ بھی بند کرادئے ہیں کہ ہم اسلام آؓباد نہ پہنچ پائیں۔
انہوں نے ایک سوال کے جواب میں کہا کہ پی ٹی آئی کے ساتھ اکھٹے نکلنا ایک آئیڈیل صورتحال تھی لیکن ہر پارٹی کا اپنا طریقہ کار ہے اور اپنے مقاصد ہیں وہ نکل چکے ہیں اور ہم بھی جارہے ہیں۔
ڈاکٹر طاہر القادری نے کہا ہمارے لوگ پچھلے بارہ دن سے محصور تھے اور آج آپنے دیکھا کہ کس طرح لوگوں نے کنٹینر اٹھا کر پھینک دئے اورہمارے ساتھ آکر شامل ہوئے ہیں اور یہ ایک تاریخ سازمارچ ہے۔
سوال پوچھا گیا کہ وہ کب تک اسلام آباد میں بیٹھے گے تو ان کا کہنا تھا کہ حکومت کی برطرفی ہمارے انقلاب کا ایک چھوٹا سا حصہ ہے اور ہم اس کے بغیر واپس نہیں پلٹیں گے۔
ان کا مزیدکہناتھا کہ ہماری ٹرانسپورٹ روک لی گئی ہے جس کے باعث ہمارے لوگ پیدل جارہے ہیں یہ پنجاب حکومت کی جانب سےظلم کی انتہا ہے، ہمیں نہیں معلوم کہ ہم کتنے دن میں اسلام آباد پہنچیں گے اور اس پیدل مارچ کے ہمارے لوگوں کی زندگیوں پر کیا اثرات ہونگے۔