ہنگو: سیکیورٹی فورسز نے دہشتگردوں کا حملہ پسپا کردیا، مقابلے میں بیس شدت پسند مارے گئے، دوسری جانب راولپنڈی اور اسلام آباد میں سرچ آپریشن کے دوران ایک سو پچاسی افراد گرفتار کر لئے گئے۔
ملک بھر میں دہشتگردوں کیخلاف فیصلہ کن جنگ کا ناقابلِ واپسی مرحلہ شروع ہوچکا ہے، قانون نافذ کرنے والوں نے دہشتگردوں کے گرد گھیرا تنگ کردیا ہے، ہنگو میں سیکیورٹی فورسز نے دہشتگردوں کے عزائم خاک میں ملا دیئے۔
خزینہ چوک پوسٹ پر دہشتگرد بھاری ہتھیاروں کے ساتھ حملہ آور ہوئے، فورسز کی بھرپور جوابی کارروائی میں بیس شدت پسند مارے گئے۔
دوسری جانب ملک کے مختلف شہروں میں سرچ آپریشنز کا سلسلہ جاری ہے، اسلام آباد اور راولپنڈی میں تیسرے روز بھی قانون نافذ کرنے والے ادارے متحرک نظر آتے ہیں، اڈیا لہ جیل، ایئر پورٹ ،ریلوے اسٹیشن، ریس کو ریس، نصیر آباد، کینٹ، آر اے بازار، ٹیکسلا ، واہ کینٹ، نیو ٹاون اور پیر ودھائی سمیت متعدد علاقوں میں کارروائی کے دوران چار افغان باشندوں سمیت ایک سو پچاسی افراد حراست میں لئے گئے۔
پولیس کے مطابق ملزمان سے اسلحہ بھی بر آمد ہوا، ذرائع کے مطابق آپریشن کا ٹارگٹ کالعدم تنظیموں کے اہم رہنما، سہولت کار اور افغان باشندے ہیں۔
