ریاض : مملکت میں مقیم تمام غیرملکیوں کو سہولیات کی فراہمی کیلئے سعودی حکومت نے اہم اقدامات کیلئے ہیں جس کے تحت تارکین وطن کو امیگریشن قوانین پر عمل درآمد میں آسانی میسر ہوگی۔
سعودی خبر رساں ادارے کی رپورٹ کے مطابق سعودی عرب میں گزشتہ برس سے امیگریشن قوانین میں کافی تبدیلیاں کی گئی ہیں جن کا مقصد شہریوں اور یہاں رہنے والے غیرملکیوں کو سہولتیں فراہم کرنا ہے۔
قوانین میں کی جانے والی تبدیلیوں سے ایسے اقامہ ہولڈر تارکین وطن کو کافی فائدہ ہے جو اپنے اہل خانہ کے ہمراہ مملکت میں مقیم ہیں۔
امیگریشن قوانین میں تبدیلیوں سے قبل تارکین کے وہ اہل خانہ جو خروج وعودہ پرجاتے تھے انہیں خروج وعودہ کی مدت ختم ہونے سے قبل لازمی طور پر مملکت آنا ہوتا تھا جس کے بعد ہی ان کا اقامہ تجدید کیا جاتا تھا۔
اقامہ کی تجدید اور خروج وعودہ کے دوبارہ اجرا کا عمل سعودی عرب آئے بغیر ممکن نہیں تھا جو تارکین پر اضافی مالی بوجھ کا باعث تھا۔
ایسے تارکین جن کے بچے اعلیٰ تعلیم کے لیے مملکت سے باہر جاتے تھے انہیں سال میں دو چکر لگانے پڑتے تھے تاکہ اقامہ کی تجدید اور دوبارہ ایگزٹ ری انٹری ویزہ حاصل کیا جاسکے۔
ایک شخص نے خروج وعودہ قانون کے حوالے سے دریافت کیا چھٹی پرپاکستان گئے ہوئے ہیں، خروج وعودہ کی مدت میں توسیع اپنے ابشر اکاؤنٹ سے کی جاسکتی ہے یا کفیل کے ذریعے ہی ممکن ہے؟
اس حوالے سے جوازات کے قانون کے مطابق گزشتہ برس سے بیرون مملکت خروج وعودہ پر جانے والوں کے لیے یہ سہولت جاری کی گئی ہے کہ ان کے خروج وعودہ اور اقامہ کی مدت میں مملکت سے باہر رہتے ہوئے بھی توسیع کرائی جاسکتی ہے۔
ایسے اقامہ ہولڈرز جو مملکت سے باہر ہیں ان کے اسپانسر کے ابشر یا مقیم اکاؤنٹ کے ذریعے اقامہ اور خروج و عودہ کی مدت میں توسیع کرائی جاسکتی ہے۔
نئی تبدیلیوں سے قبل اقامہ ہولڈرغیرملکیوں کے اقاموں اور خروج وعودہ کی مدت میں مملکت سے باہر رہتے ہوئے توسیع کرنا ناممکن ہوا کرتی تھی۔
امیگریشن قوانین میں تبدیلی کے بعد مملکت سے باہر گئے ہوئے اقامہ ہولڈرز کے خروج وعودہ "ایگزٹ ری انٹری” کی مدت میں ابشر اکاؤنٹ کے ذریعے توسیع کرانا ممکن ہوگیا ہے۔
قانون کے تحت غیرملکی کارکن کے اقامے اور خروج وعودہ کی مدت میں توسیع ان کے اسپانسر کے ابشر یا مقیم اکاؤنٹ کے ذریعے کی جاتی ہے۔
خروج وعودہ یا اقامہ کی مدت میں توسیع کے لیے مطلوبہ مدت کی فیس جوکہ ایک سو ریال ماہانہ ہے ادا کرنے کے بعد کارکن کے کفیل کے ابشر یا مقیم اکاونٹ سے توسیع کرائی جاتی ہے۔
اوورسیز پاکستانی فاونڈیشن کا کارڈ بنوانا ہے، کہاں سے بنوایا جاسکتا ہے؟
بیرون ملک مقیم پاکستانیوں کی فلاح وبہبود کے ادارے "اوورسیز پاکستانی فاونڈیشن” (او پی ایف) کا رکن بننے اور اس ادارے میں رجسٹریشن کے لیے ریاض میں پاکستانی سفارت خانے یا جدہ میں قونصلیٹ سے رجوع کیا جائے جہاں شعبہ ویلفیئر میں موجود اہلکار تمام تفصیلات سے آگاہ کردیں گے۔
