ریاض: سعودی عرب میں نازیبا لباس پہننے سمیت دیگر غیر اخلاقی حرکتوں پر 100 افراد کو گرفتار کرلیا گیا۔
سعودی ویب سائٹ کے مطابق حکام نے مدینہ اور جازان میں غیر اخلاقی لباس پہن کر عوامی مقامات پر گھومنے والے 100 افراد کو گرفتار کیا ہے۔
ترجمان پولیس کے مطابق جازان میلے میں سماجی تہذیب کے منافی غیر اخلاقی لباس پہن کر آنے والے 33 افراد کو حراست میں لیا گیا ہے۔ زیر حراست نوجوان مختلف اوقات میں عوامی مقامات پر نازیبا لباس پہن کر گھوم رہے تھے۔
ان میں سے بعض دیواروں اور بسوں پر اخلاق سوز جملے تحریر کرتے ہوئے بھی پائے گئے جبکہ کئی نوجوانوں کو پارکوں اور چوراہوں پر الاؤ روشن کرنے اور کئی کو معذوروں اور بوڑھوں کی نشستوں پر بیٹھنے اور معذوروں اور بوڑھوں کو جگہ نہ دینے پر گرفتار کیا گیا ہے۔
مدینہ پولیس کے ترجمان کا کہنا ہے کہ شہر میں 2 ہفتوں کے دوران سماجی تہذیب کی خلاف ورزیوں پر 67 ا فراد کو گرفتار کیا گیا ہے۔
سعودی پولیس مملکت میں سماجی تہذیب (الذوق العام) کی خلاف ورزیوں پر کڑی نگاہ رکھے ہوئے ہے اور اس حوالے سے سخت اقدامات کیے جارہے ہیں۔
ترجمان کا کہنا تھا کہ پبلک مقامات پر بغیر اجازت لٹریچر تقسیم کرنے، آبادی میں اونچی آواز سے موسیقی سننے اور اذان کے وقت گانے سننے پر نوجوانوں کو پکڑا گیا ہے۔
مذکورہ گرفتاریاں مقامی شہریوں کی شکایات پر کی گئی ہیں۔ پولیس نے شکایت ملنے پر حقیقت حال دریافت کر کے قصور واروں کو مقررہ سزا بھی دلا دی ہے۔
