نیٹو کے 11 رکن ممالک نے یوکرین کی نیٹو میں رکنیت کی مخالفت کر دی ہے جس کی یوکرین کے صدارتی دفتر نے تصدیق کر دی ہے۔
غیر ملکی میڈیا کے مطابق یوکرین کے صدارتی دفتر کے نائب سربراہ ایگور ژوکوا نے کہا ہے کہ نیٹو کے 31 رکن ممالک میں سے 11 ممالک یوکرین کی نیٹو میں رکنیت کے مخالف ہیں اور ان کی جانب سے یوکرین کی درخواست کی حمایت نہیں کی گئی ہے۔
اپنے فیس بک پیج پر صدر یوکرین ولادیمیر زیلنسکی کے نائب نے اپنے ایک پیغام میں لکھا ہے کہ یوکرین کو نیٹو میں رکنیت کی درخواست کے سلسلے میں 20 ممالک کی حمایت حاصل ہوئی ہے۔ انھوں نے یہ پیغام یوکرین کے صدر زیلنسکی اور کینیڈا کے وزیراعظم جسٹن ٹروڈو کے درمیان ایک دستاویز پر دستخط کے بعد جاری کیا ہے کہ جس میں کینیڈا نے یوکرین کی نیٹو میں شمولیت کی حمایت کا اعلان کیا ہے۔
یہ خبر ایک ایسے سامنے آئی ہے کہ جب نیٹو میں امریکا کی سفیر جولیان اسمتھ نے کہا ہے کہ نیٹو میں یوکرین کی شمولیت کا امکان بہت کم ہے۔ نیٹو کے سیکریٹری جنرل اسٹولٹنبرگ نے بھی حال ہی میں اس بات پر زور دیا ہے کہ جب تک روس کے خلاف جنگ جاری ہے، یوکرین نیٹو میں شامل نہیں ہوسکتا ہے۔
واضح رہے کہ روس کے صدر ولادیمیر پیوٹن اس حوالے سے پہلے ہی متنبہ کرچکے ہیں کہ یوکرین کی نیٹو میں شمولیت ماسکو کی ریڈ لائن ہے۔
