کراچی : شادی کی تقریب میں گولی چلنے سے تیرہ سالہ لڑکا جاں بحق ہوگیا ، پولیس نے گولی چلانے والے زخمی ملزم کو گرفتار کرکے تھانے منتقل کردیا۔
تفصیلات کے مطابق کراچی کے علاقے کورنگی ڈھائی نمبر میں شادی کی تقریب میں ہوائی فائرنگ کی زد میں آکر تیرہ سالہ بچہ جاں بحق ہوگیا۔
پولیس نے بتایا کہ شادی ہال کے باہر ہوائی فائرنگ سے تیرہ سالہ اریب شدید زخمی ہوا، زخمی اریب کو اسپتال پہنچایا گیا جہاں اس نے دم توڑدیا، اریب شاہ اپنے کزن شکیل کی فائرنگ سے جاں بحق ہوا۔
حکام کے مطابق شکیل کے بھائی کی شادی تھی، گولی نکالنے کے دوران گولی چل گئی جو اریب شاہ کو لگی، فائرنگ کرنے والا ملزم بھی گولی لگنے سے زخمی ہوا تاہم ملزم کو گرفتار کرکے زمان ٹاؤن تھانے منتقل کر دیا گیا ہے۔
زمان ٹاؤن پولیس نے کہا ہے کہ جس مقام پر واقعہ پیش آیا وہاں کئی شادی ہال ہیں، کس شادی ہال کےباہرفائرنگ کا واقعہ پیش آیاتعین کررہےہیں اور جاں بحق بچےکےلواحقین سےبھی معلومات حاصل کی جارہی ہیں، ہوائی فائرنگ کرنے والوں کےخلاف کارروائی کریں گے۔
ملزم کے ماموں نے اے آر وائی نیوز سے گفتگو کرتے ہوئے کہا کہ میرابھانجاشکیل پیروں سےمعذورہے، شکیل نے ہوائی فائرنگ کی اور پھر پستول چیک کر رہا تھا کہ اتفاقیہ گولی چلی جو اریب شاہ کو لگی۔
ماموں کا کہنا تھا کہ اریب شاہ ہمارے عزیز کا لڑکا ہے، اس کے اہلخانہ کوئی قانونی کارروائی نہیں کرناچاہتے۔
