The news is by your side.

یو اے ای میں ارشد شریف کس کس سے ملے ؟ ٹیم تحقیقات کے لئے پہنچ گئی

اسلام آباد : سینئر صحافی ارشد شریف کی شہادت کی تحقیقات اور حقائق جاننے کیلئے ٹیم یو اے ای پہنچ گئی، جہاں ٹیم ارشد شریف کے یواے ای چھوڑنے کی وجوہات کا جائزہ لے گی۔

تفصیلات کے مطابق سینئر صحافی ارشد شریف کی شہادت کی تحقیقات کیلئے 2 رکنی ٹیم متحدہ عرب امارات پہنچ گئی۔

ذرائع نے بتایا کہ تحقیقاتی ٹیم میں ڈپٹی ڈی جی آئی بی اور ڈائریکٹر ایف آئی اے شامل ہیں ، ٹیم ارشد شریف کے یواے ای پہنچنے اور کینیا جانے کے معاملے کی تحقیقات کرے گی۔

ذرائع کا کہنا ہے کہ یو اے ای میں ارشد شریف کس کس سے ملے ؟ اس حوالے سے بھی ٹیم تحقیقات کرے گی۔

ذرائع کے مطابق تحقیقاتی ٹیم ارشد شریف کے رہائش پذیر ہونے والی جگہ کا دورہ کرے گی اور ارشد شریف کو یواے ای چھوڑنے کی وجوہات کا بھی جائزہ لیا جائے گا۔

گذشتہ روز شہید ارشد شریف کی پوسٹ مارٹم رپورٹ سامنے آئی تھی ، جس میں بتایا گیا تھا کہ ارشد شریف کی لاش پر بارہ زخم پائے گئے تھے، ان کی بائیں آنکھ کے گرد سیاہ نشان تھا جبکہ گردن کے بائیں جانب زخم اور چھاتی کے دائیں جانب سینے پر زخم موجود تھا۔

رپورٹ میں کہا ہے کہ ارشد شریف کی کمر پر موجود زخم کے گرد سیاہ نشان موجود تھا اور ان کے دائیں ہاتھ کے چار ناخن موجود نہیں تھے جبکہ ان کی دائیں کلائی پر رگڑ کا نشان موجود تھا۔

رپورٹ کے مطابق ارشد شریف کی کھوپڑی کی بائیں جانب کی ہڈی غائب تھی اور ان کے دماغ کے بائیں جانب متاثر ہوا تھا، گولی سے ارشد شریف کا دماغ، پھیپڑا شدید متاثر ہوا۔

Comments

یہ بھی پڑھیں