لاہور : پنجاب کے دارلحکومت لاہور میں بارش کا 30 سالہ ریکارڈ ٹوٹ گیا، شہر کی سڑکوں پر اربن فلڈنگ کی صورتحال ہے۔
تفصیلات کے مطابق پنجاب کے دارلحکومت لاہور میں بارش کا 30 سالہ ریکارڈ ٹوٹ گیا، 10گھنٹےمیں 291ملی میٹر بارش ریکارڈ کی گئی، گلبرگ، کینال روڈ، لکشمی چوک اور نشتر ٹاؤن سمیت بیشترعلاقے زیر آب ہیں، اسپتالوں میں پانی داخل ہوگیا ہے۔
نشیبی علاقوں میں مکانات ڈوب گئے ہیں، شہر بھرکے انڈر پاس بند کردیئے گئے جبکہ شاہراہوں پر ٹریفک کی روانی معطل ہے
شہر بھر کے درجن سے زائد علاقوں میں 200 ملی میٹر سے زائد بارش ریکارڈ ہوئی ، انتظامیہ اور واسا کے تمام افسران و اسٹاف نکاسی آب کیلئے مکمل متحرک ہیں۔
کمشنرلاہور علی رندھاوا نے بتایا کہ رواں سال لاہورمیں 256 ملی میٹر بارش 26 جون کوہوئی تھی، گزشتہ سال 2022میں لاہور میں 238 ملی میٹر بارش ریکارڈ کی گئی تھی جبکہ 2018میں لاہور میں 288ملی میٹربارش ریکارڈکی گئی تھی، 30سال میں لاہور میں اتنے کم وقت میں اتنی بارش نہیں ہوئی۔
ایم ڈی واسا غفران احمد نے کہا کہ بارش تھمنے کے چند گھنٹےمیں ہی نشیبی علاقے کلیئرکردیئےجائیں گے، سسٹم اپنی مکمل استعداد پر نکاسی آب کو ممکن بنا رہا ہے۔
دوسری جانب نگراں وزیراعلیٰ محسن نقوی نے اپنے ٹوئٹ میں کہا کہ لاہور میں 8گھنٹےسے جاری موسلادھار بارش نے ریکارڈ توڑ دیئے، لاہور کی سڑکوں پر اربن فلڈنگ کی صورتحال ہے اور کینال بھی اوورفلو ہوگیا۔
محسن نقوی کا کہنا تھا کہ پانی کی نکاسی کیلئے کابینہ اور تمام انتظامیہ سڑکوں پر موجود ہے، امدادی سرگرمیوں کی خود مانیٹرنگ کررہاہے،انتظامیہ سے رابطے میں ہوں۔
لاہور میں مسلسل بارش کے باعث پانی گھروں اور دفاتر میں داخل ہوگیا ہے، نشیبی علاقے تالاب ،سڑکیں اورگلیاں ندی نالے بن گئے، پانی سے بھری سڑکیں عوام کیلئے مشکلات کا سبب بن گئیں۔
