بہاولپور: خون سفید ہوگیا، بہاولپور میں بھائی نے زمین کے تنازع پر بھائی سمیت چار افراد کو موت کے گھاٹ اتاردیا۔
پولیس کے مطابق واقعہ بہاولپور کے نواحی علاقے تھانہ ہیڈراجکاں کی حدود میں پیش آیا، جہاں ملزم محمد نواز کا اپنے بھائی مقصود کے ساتھ زمین کا تنازعہ چل رہاتھا، ا سی رنجش میں ملزم نے گھر میں گھس کر کلہاڑی اور چھریوں کے وار کرکے اپنے سگے بھائی کے پورے خاندان کو ختم کردیا۔
واقعے میں ملزم نواز کا بھائی، اس کی بیوی اور دو بیٹیاں موقع پر ہی جاں بحق ہوگئیں، دلخراش واقعے کے بعد ملزم نواز نے تھانہ ہیڈ راجکاں میں جاکر گرفتاری دے دی۔
واقعے کے بعد امدادی ٹیمیں جائے حادثے پر پہنچی اور لاشوں کو ضابطے کی کارروائی کے لئے اسپتال منتقل کیا۔
جاں بحق افراد کی شناخت مقصود ، وسیم بی بی، سویرابی بی اور گلشن رانی کے نام سے ہوئی ہے۔
دوسری جانب آئی جی پنجاب نے بہاولپور میں زمین کے تنازع پر چار افراد کے قتل کا نوٹس لے لیا ہے، آئی جی پنجاب نے آر پی او بہاولپور سے واقعہ کی رپورٹ طلب کرلی ہے اور واقعے کی فوری قانونی کارروائی کی ہدایت کی ہے۔