راولپنڈی : بلوچستان میں ژوب گیریژن پر دہشت گردوں کے حملے میں 4 سیکیورٹی اہلکار شہید اور 5 زخمی ہوگئے جبکہ 3 مسلح دہشت گرد بھی ہلاک ہوئے۔
تفصیلات کے مطابق پاک فوج کے شعبہ تعلقات عامہ (آئی ایس پی آر) کی جانب سے بیان میں کہا گیا کہ بلوچستان کےعلاقے ژوب میں دہشتگردوں نے گیریژن کے علاقے میں حملہ کردیا ، دہشت گردوں نےعلی الصبح شدیدحملہ کیا۔
آئی ایس پی آر کا کہنا تھا کہ سیکیورٹی اہلکاروں نے دہشتگردوں کی تنصیبات میں داخلے کی کوشش ناکام بنا دی، اس دوران شدید فائرنگ کے تبادلے میں دہشت گردوں کو ایک جگہ محدود کردیا گیا۔
شدید فائرنگ کے تبادلے میں بھاری ہتھیاروں سے لیس تین دہشت گرد مارے گئے، جس کے بعد سیکیورٹی فورسز کا بقیہ 2 دہشت گردوں کو پکڑنے کیلئے کلیئرنس آپریشن جاری ہے۔
کلیئرنس آپریشن کے دوران چار سیکیورٹی اہلکار شہید ہوگئے جبکہ پانچ اہلکار شدید زخمی ہیں۔
ترجمان کے مطابق سیکیورٹی فورسز بلوچستان اور پاکستان کے امن کو تباہ کرنے کی تمام گھناؤنی کوششوں کو ناکام بنانے کے لئے پرعزم ہیں۔
