The news is by your side.

Advertisement

4 کروڑ سے زائد بچوں کی پولیو ویکسی نیشن ہو گئی

اسلام آباد: قومی انسداد پولیو مہم میں 4 کروڑ سے زائد بچوں کی ویکسی نیشن کی گئی۔

تفصیلات کے مطابق ملک میں قومی انسداد پولیو مہم کا اختتام ہو چکا ہے، مہم کے دوران چار کروڑ سے زائد بچوں کو پولیو کے قطرے پلائے گئے۔

پولیو مہم میں 3 کروڑ سے زائد بچوں کو وٹامن اے کے قطرے بھی پلائے گئے، اس مہم میں 2 لاکھ 87 ہزار پولیو ورکرز نے حصہ لیا، اور مہم کے دوران کرونا ایس او پیز پر عمل درآمد کیا گیا۔

ڈی جی ہیلتھ ڈاکٹر صفدر رانا نے کہا کہ انسداد پولیو ورکرز کی کارکردگی قابل ستائش رہی ہے، سیکیورٹی اداروں نے پر امن پولیو مہم کا انعقاد یقینی بنایا۔

ڈاکٹر صفدر نے کہا ملک کو پولیو سے پاک کرنے تک جدوجہد جاری رہے گی، والدین بچوں کی پولیو ویکسینیشن ضرور کرائیں، آئندہ قومی انسداد پولیو مہم مارچ میں ہوگی۔

یاد رہے کہ اتوار کو رواں سال کی پہلی قومی انسداد پولیو مہم کی ابتدائی کارکردگی رپورٹ تیار کی گئی تھی، جس میں کہا گیا تھا کہ مہم نے مقررہ ہدف کا 98 فی صد حاصل کر لیا ہے، پولیو مہم کا ہدف 4 کروڑ 56 ہزار بچوں کی ویکسی نیشن تھا۔

ذرائع وزارت صحت نے بتایا تھا کہ اتوار کو آخری کیچ اپ ڈے میں کراچی، کوئٹہ، پشاور، خیبر بلاک میں رہ جانے والے بچوں کی ویکسی نیشن کی گئی تھی، یہ مہم ہائی رسک علاقوں میں 5 روز اور 2 روز کیچ اپ ڈیز پر مشتمل تھی، جب کہ ملک کے دیگر علاقوں میں 3 روزہ پولیو مہم، اور 2 روز کیچ اپ ڈیز پر مشتمل تھی۔

مہم کے دوران 5 تا 59 ماہ عمر کے بچوں کو وٹامن اے کے قطرے بھی پلائے گئے، جس کا مقصد بچوں کی قوت مدافعت میں اضافہ کرنا تھا۔ پولیو مہم میں 2 لاکھ 87 ہزار ورکرز نے حصہ لیا، عملے کو کرونا ایس او پیز کی ٹریننگ دی گئی تھی۔

Comments

یہ بھی پڑھیں