کراچی: کرکٹ شائقین کے لیے اچھی خبر ہے کہ ایشیا کپ 2023 کی میزبانی پاکستان کو مل گئی۔
اے آر وائی نیوز کے مطابق ایشین کرکٹ کونسل کے اجلاس میں ایشیا کپ 2023 کی میزبانی پاکستان کو دے دی گئی، ذرائع کا کہنا ہے کہ ایشیا کپ 2023 پاکستان میں کھیلا جائے گا۔
اے سی سی میٹنگ کی صدارت بھارت کے جے شاہ نے کی، بھارتی بورڈ نے پاکستان کی میزبانی کو منظور کیا۔
ایشیا کپ 2022 کی میزبانی سری لنکا کرے گا جو کہ ٹوئنٹی فارمیٹ پر مشتمل ہوگا جبکہ ایشیا کپ 2023 ون ڈے فارمیٹ پر کھیلا جائے گا۔
واضح رہے کہ کورونا وائرس کے سبب ایشیا کپ ٹی 20 بھی ملتوی کردیا گیا تھا، ایشیا کپ سری لنکا میں شیڈول تھا۔
سربراہ سری لنکن کرکٹ بورڈ کا کہنا تھا کہ کورونا کے سبب ایشیا کپ کا انعقاد ممکن نہیں ہے۔
مزید پڑھیں: رمیز راجا کو بھارتی لیگ کا فائنل دیکھنے کی دعوت
کچھ دیر قبل پی سی بی کے چیئرمین رمیز راجہ کی بھارتی کرکٹ بورڈ کے صدر سارو گنگولی سے دبئی میں ملاقات ہوئی تھی، یہ ملاقات ایشین کرکٹ کونسل کے ایگزیکٹو بورڈ میٹنگ کے موقع پر ہوئی۔
بھارتی کرکٹ بورڈ کے صدر سارو گنگولی نے چیئرمین پاکستان کرکٹ بورڈ رمیز راجا کو انڈین لیگ کا فائنل دیکھنے کی دعوت دی تھی۔
ذرائع کا کہنا تھا کہ رمیز راجہ دعوت کے باوجود آج ہونے والا آئی پی ایل کا فائنل نہیں دیکھیں گے۔
سابق کرکٹرز کےدرمیان غیر رسمی ملاقات خوشگوار ماحول میں ہوئی جس میں باہمی کرکٹ کی بحالی پر تبادلہ خیال کیا گیا تھا ملاقات میں ایشین بلاک کو متحرک کرنے پر بھی بات جیت ہوئی تھی۔
