راولپنڈی : اینٹی نارکوٹکس فورس (اے این ایف) کی منشیات فروشوں کے خلاف ملک گیر کارروائیاں جاری ہیں، جس میں مجموعی طور پر 6 ملزمان کو گرفتار کرکے ایک من سے زائد چرس اور دیگر منشیات برآمد کرلی گئی۔
تفصیلات کے مطابق اسلام آباد موٹروے ٹول پلازہ پر اے این ایف کی ٹیم نے ایک ٹریلرسے21کلو چرس،7کلو افیون برآمد کرلی، کارروائی کے دوران فیصل آباد کے رہائشی2ملزمان گرفتار کرلیے۔
دوسری کارروائی میں چارسدہ کی رہائشی2خواتین سے 4 کلو سے زائد چرس برآمد کی گئی ہے، رنگ روڈ پشاور کے قریب کوریئر آفس میں لاہور، مانسہرہ کیلئے بک پارسل سے منشیات برآمد کرلی گئی۔
اے این ایف ذرائع کے مطابق برآمد شدہ منشیات میں3 کلو چرس اور350 گرام آئس شامل ہے، منشیات کو جوتوں کے ڈبوں میں چھپایا گیا تھا۔
ایک اور کارروائی میں کوئٹہ سوناچوک کراچی روڈ کے قریب کار سے9 کلو 600 گرام چرس اور 3 کلو آئس برآمد کی گئی کارروائی کے دوران2 ملزمان گرفتار کیے گئے۔
اس کے علاوہ کوئٹہ ائیرپورٹ روڈ کے قریب ملزم سے5کلو چرس برآمد کرلی گئی، تمام گرفتار ملزمان کے خلاف انسداد منشیات ایکٹ کے تحت مقدمات درج کرکے مزید تفتیش کا آغاز کردیا گیا ہے۔
