روم: اٹلی میں ایک 6 ماہ کی بچی اور ایک 102 سالہ خاتون کرونا وائرس کو شکست دینے کے بعد گھر لوٹ آئیں، ڈاکٹرز نے ان دونوں کو امید کی کرن قرار دیا ہے۔
اٹلی کے علاقے لمبارڈی کی رہائشی 6 ماہ کی لیونارڈو 50 دن تک اسپتال میں رہنے کے بعد بالآخر کرونا وائرس کو شکست دے کر گھر لوٹ آئی۔
مقامی میئر نے ننھی بچی کو امید کی کرن قرار دیا ہے اور اس کی صحتیابی پر بے حد خوشی کا اظہار کیا ہے۔ انہوں نے کہا کہ آج ہمیں خوش ہونے اور مسکرانے کی ایک وجہ ملی ہے۔
انہوں نے بچی اور اس کے والدین کا شکریہ ادا کرتے ہوئے کہا کہ ہمت نہ ہارنے کے لیے آپ کا شکریہ، آج آپ کی وجہ سے شہر کے تمام مرجھائے ہوئے چہروں پر بہار آگئی ہے۔
بچی کی ماں کا کہنا ہے کہ وہ بچی کے لیے بہت پریشان تھیں، ’میری دعا ہے کہ ایسا وقت کسی اور ماں پر نہ گزرے‘۔
دوسری جانب 102 سالہ خاتون اٹالیکا گروڈونا شمالی اٹلی کی رہائشی ہیں، انہوں نے 20 دن اسپتال میں گزارے۔ ڈاکٹرز کا کہنا ہے کہ کرونا نے اٹالیکا کے حوصلے کے سامنے ہار مان لی۔
خیال رہے کہ اٹلی میں کرونا وائرس کے باعث 12 ہزار 428 اموات ہوگئی ہیں، صرف گزشتہ 24 گھنٹوں میں 837 افراد جان کی بازی ہار گئے جبکہ اب تک 1 لاکھ سے زائد افراد وائرس سے متاثر ہو چکے ہیں۔
