ترک شہری نے فریضہ حج کی ادائیگی کے لیے جرمنی سے سائیکل کا سفر شروع کر دیا وہ 6 ہزار کلومیٹر طویل سفر کریں گے۔
حج اسلام کا پانچواں رکن اور ہر صاحب استطاعت پر فرض ہے۔ مواصلاتی ترقی نے ماضی کی نسبت حج کے سفر کو آرام دہ اور مختصر بنا دیا ہے تاہم آج بھی ایسے مہم جو ہیں جو اس فریضہ کی ادائیگی کے لیے سخت مشقت والا سفر کرتے ہیں۔
ایسے ہی ایک مہم جو ترک شہری 26 سالہ باراک اوزترک ہیں جنہوں نے 2025 میں فریضہ حج کی ادائیگی کے لیے جرمنی سے سائیکل پر سفر کا آغاز کر دیا ہے۔ وہ 6 ہزار کلومیٹر طویل سفر طے کر کے وقت حج سعودی عرب پہنچیں گے۔
سبق نیوز کے مطابق بوراک اوزترک جو اس وقت جرمنی میں مقیم ہیں، اپنے سفر کے پہلے مرحلے میں آسٹریا پہنچیں گے، جہاں سے سلووینیا، کروشیا، سربیا، کوسوو، شمالی مقدونیہ، یونان، ترکیہ، شام اور اردن سے ہوتے ہوئے سعودی عرب میں میں داخل ہوں گے۔
اپنے سفر کے حوالے سے ترک نوجوان نے تمام قانونی امور بھی مکمل کر لیے ہیں تاکہ سفر کے دوران آنے والے ممالک سے گزرنے کے دوران کسی قسم کی دشواری کا سامنا نہ کرنا پڑے۔
مذکورہ نوجوان نے سوشل میڈیا اکاؤنٹ پر مکہ مکرمہ پہنچنے کی حتمی تاریخ کا تو نہیں بتایا تاہم ان کا کہنا ہے کہ وہ وہ فریضہ حج ادا کرنے کے لیے حج ایام سے قبل مکہ مکرمہ پہنچ جائیں گے۔
ان کا کہنا ہے کہ وہ اس روحانی اور بابرکت سفر کا ارادہ وہ پچھلے دو برس سے کر رہے تھے تاہم خانگی حالات کی وجہ سے اس پر عمل درآمد میں تاخیر کا سامنا کرنا پڑا۔
واضح رہے کہ دو سال قبل پاکستانی شہری اوکاڑہ سے 5400 کلومیٹر پیدل سفر کر کے حج کے لیے مکہ مکرمہ پہنچا تھا۔
