لاہور: مسلم لیگ ن کی مرکزی نائب صدر مریم نواز کا کہنا ہے کہ نواز شریف ملک کو مہنگائی، مشکلات سے نکالیں گے۔
اے آر وائی نیوز کے مطابق مسلم لیگ ن کی مرکزی نائب صدر مریم نواز کی زیر صدارت جاتی امرا میں اجلاس ہوا جس میں رانا ثنا اللہ، پرویز رشید، سعد رفیق، مریم اورنگزیب ودیگر نے شرکت کی۔
اجلاس میں نواز شریف کی واپسی کے حوالے سے معاملات زیر غور آگئے۔
مریم نواز نے کہا کہ نواز شریف کی وطن واپسی پر پرتپاک استقبال کیا جائے گا، نواز شریف ملک کو مہنگائی، مشکلات سے نکالیں گے۔
انہوں نے کہا کہ ن لیگ نے ہمیشہ حکومت میں آکر ملک کو ترقی کی راہ پر گامزن کیا ہے۔
اس سے قبل مریم نواز کا کہنا تھا کہ عوام کی امید نواز شریف وطن واپس آ رہے ہیں، ان کی واپسی سے صرف آئین شکن پریشان ہیں۔
مریم نواز کا کہنا تھا کہ کشمیریوں اور پاکستانیوں کے مجرم عوام کے قہر سے بچ نہیں سکتے، نواز شریف نے ہی عوام کو ہمیشہ ریلیف دیا ہے۔
