ریاض: سعودی عرب میں سفر مقدس کے لیے آنے والی 84 سالہ مراکشی خاتون نصف صدی سے حج کرنے کا خواب دیکھ رہی تھیں جو بالآخر پورا ہوا۔
اردو نیوز کے مطابق مراکش کی 84 سالہ خاتون کا خواب شرمندہ تعبیر ہوگیا، مراکش کی 84 سالہ زاہیہ بوشتا نصف صدی سے زیادہ عرصے سے سفر حج کے انتظار میں تھیں۔
زاہیہ بوشتا نے دار بیضا کے محمد الخامس انٹرنیشنل ایئرپورٹ پر اپنے تاثرات بیان کرتے ہوئے کہا کہ روٹ ٹو مکہ انیشی ایٹو نے میری سفری کارروائی بھی آسان کردی۔
زاہیہ بوشتا کا کہنا ہے کہ وہ شوہر کے ساتھ حج پر جانے پر بے حد خوش ہیں اور ان کے شوہر کا بھی یہ پہلا حج ہے۔
زاہیہ بوشتا نے خوشگوار موڈ میں کہا کہ میں خود کو اس وقت 25 برس کی خاتون سمجھ رہی ہوں، اللہ کا شکر ہے کہ صحت مند ہوں اور حج کے تمام امور احسن طریقے سے انجام دے سکتی ہوں۔
انہوں نے کہا کہ اس وقت میری عمر 84 سال ہے، اس سے قبل حج نہیں کیا۔ اللہ تعالی نے مجھے ایسے بیٹے سے نوازا جس نے حج کے اخراجات برداشت کیے اور دیگر انتظامات بھی کروائے۔
انہوں نے مزید کہا کہ روٹ ٹو مکہ انیشی ایٹو کے تحت سفری کارروائی کے حوالے سے بات کروں تو یہاں شاندار استقبال کیا گیا، تمام کام لمحوں میں ہو گئے اور بے حد خیال رکھا گیا۔
