95 ویں اکیڈمی (آسکر) ایوارڈ میں ہالی ووڈ فلم ایوری تھنگ، ایوری ویئر آل ایٹ ونس نے 7 ایوارڈ حاصل کرکے میدان مار لیا۔
دنیائے فلم کے سب سے معتبر اور مقبول آسکر ایوارڈ میں ہالی ووڈ فلم ایوری تھنگ، ایوری ویئر آل ایٹ ونس نے میدان مار لیا۔ 95 ویں اکیڈمی ایوارڈ کی رنگا رنگ تقریب جمی آسکرز کی میزبانی میں امریکی شہر لاس اینجلس میں منعقد ہوئی۔ تقریب سے قبل ریڈ کارپٹ پر فلمی ستاروں نے جلوے بکھیرے۔
ہالی ووڈ باکس آفس پر دھوم مچانے والی فلم ’’ ایوری تھنگ، ایوری ویئر آل ایٹ ونس‘‘ نے اکیڈمی ایوارڈ میں بھی دھوم مچائی اور 7 ایوارڈ حاصل کرکے میدان مارا۔
مذکورہ فلم نے بہترین فلم، بہترین ہدایتکار، بہترین اداکارہ، بہترین معاون اداکار، بہترین معاون اداکارہ، بہترین اوریجنل اسکرین پلے اور بہترین ایڈیٹنگ کے زمرے میں ایوارڈز اپنے نام کیے۔
مشیل یوہ کو بہترین اداکارہ، ڈینیئل کوان اور ڈینیئل سینرٹ کو بہترین ہدایتکار، کی ہو کوان کو بہترین معاون اداکار، جمی کرلٹس کو بہترین معاون اداکارہ کے ایوارڈز سے نوازا گیا۔
بہترین اداکار کا ایوارڈ فلم ’’دی وہیل‘‘ میں مرکزی کردار نبھانے والے اداکار برینڈن فریزر کو دیا گیا۔ اسی فلم کو میک اپ اور ہیئر اسٹائلنگ کے شعبے میں بھی ایک ایوارڈ سے نوازا گیا۔
95 ویں آسکر ایوارڈز میں جرمنی کی فلم ’’آل کوائیٹ آن دی ویسٹرن فرنٹ‘‘ نے بھی کمال کر دکھایا اور بہترین انٹرنیشنل فیچر فلم ایوارڈ سمیت 4 اعزازات سمیٹ لیے۔
مذکورہ فلم کے لیے والکر برٹلے مین کو بہترین اوریجنل اسکور کے زمرے میں جب کہ جیمز فرینڈز کو بہترین سینما ٹوگرافی کے شعبے میں ایوارڈز دیے گئے اس کے علاوہ اسی فلم نے پروڈکشن ڈیزائن کے شعبے میں بھی میدان مارا۔
نوالنی نے بہترین دستاویزی فلم کا آسکر جیتا تو بہترین اینیمیٹڈ فلم کا ایوارڈ پینوکیو کے نام رہا۔ فلم ’’ویمن ٹاکنگ‘‘ کو بیسٹ ایڈاپٹڈ اسکرین پلے، ’’اواتار، دی وے آف واٹر‘‘ کو بہترین ویژول ایفیکیٹ، فلم ’’ٹاپ گن میورک‘‘ کو بہترین ساؤنڈ، دی جب کہ ’’بلیک پینتھر واکانڈا فار ایور‘‘ کے لیے رتھ کارٹر کو کاسٹیوم ڈیزائن کے شعبے میں انعام دیا گیا۔
بھارت بھی دو آسکر ایوارڈ لے اڑا۔ فلم دی ایلیفینٹ وسپرز بیسٹ ڈاکومینٹری شارٹ فلم کا ایوارڈ دیا گیا جب کہ بالی ووڈ باکس آفس پر دھوم مچانے والی فلم آر آر آر کے گانے ناٹو ناٹو کے لیے بیسٹ اوریجنل گانے کا آسکر ایوارڈ ایم ایم کیراونی اور چندر بوس کو ملا۔
تقریب میں نوبل انعامہ یافتہ ملالہ یوسف زئی نے بھی شرکت کی۔ ان کی مختصر دورانیے کی دستاویزی فلم اسٹرینجر ایٹ دا گیٹ کو بھی آسکرز کے لیے نامزد تھی۔
