اسلام آباد : ترجمان دفتر خارجہ کا کہنا ہے کہ پاک ایران گیس پائپ لائن معاملے پر امریکی حکام سےرابطےمیں ہیں اور امریکا کیساتھ توانائی ضروریات سے متعلق بات چیت کی ہے۔

تفصیلات کے مطابق ترجمان دفتر خارجہ ممتاز زہرا بلوچ نے میڈیا بریفنگ دیتے ہوئے کہا کہ پاکستان کی توانائی کی اپنی اہم ضروریات ہیں ، پاکستان اور ایران کے درمیان توانائی پرتعاون موجود ہے۔

ممتاز زہرا بلوچ نے بتایا کہ پاکستان اور ایران نے توانائی کے مختلف دیگر ذرائع پر بات کی ہے تاہم پاک ایران گیس پائپ لائن معاملے پر امریکی حکام سےرابطےمیں ہیں اور امریکا کیساتھ توانائی ضروریات سے متعلق بات چیت کی ہے کیونکہ پاکستان کو اپنی توانائی کی ضروریات کو دیکھنا ہے۔

ترجمان کا کہنا تھا کہ پاکستان اور ایران کے درمیان ترجیحی تجارت کامعاہدہ موجود ہے، ایران کے ساتھ آزادانہ تجارت کے معاہدے پر مذاکرات جاری ہیں۔

ایرانی صدر دورہ پاکستان کے حوالے سے انھوں نے بتایا کہ ایرانی صدر نے پاکستان کا دورہ کیا، ایران صدر سےتجارت، فری ٹریڈ ایگریمنٹ ، سرحدی علاقوں میں مارکیٹس کے قیام پر بات ہوئی ساتھ ہی دونوں جانب سے دہشتگردی کے خاتمے ، مشترکہ کوششوں پر بھی بات ہوئی۔

ترجمان نے مزید بتایا کہ پاکستان اور ایران دونوں جانب سے غزہ کی صورتحال پر تشویش کا اظہار کیا گیا اور دونوں فریقین نے غزہ ،فلسطین ایشو کوپرامن طریقے سے حل کرنے پرزور دیا۔

ممتاز زہرا بلوچ کا کہنا تھا کہ پاکستان کے اپنے ہمسایہ ملک ایران کے ساتھ تجارتی تعلقات ہیں ، ایران پاکستان سرحدی علاقوں میں تجارت سے مقامی لوگوں کو فائدہ ملے گا، بارڈر مارکیٹ سے مقامی تجارت مستفید ہوسکیں گے۔

انھوں نے کہا کہ پاکستان اور امریکا کے درمیان مختلف ذرائع سے بات چیت ہوتی رہتی ہے، پاکستان ہمسائے ممالک کیساتھ امن سیکورٹی ،خوشحالی کی خاطر تعلقات رکھنا چاہتا ہے۔

لاہور : لاہور ہائی کورٹ نے عدت مکمل کیے بغیر بیوی کی بہن سے شادی کو غیر قانونی قرار دے دیا اور کہا بیوی کی عدت مکمل ہونے سے پہلے اس کی بہن سے شادی قابل سزا جرم ہے۔

تفصیلات کے مطابق لاہور ہائیکورٹ نے عدت مکمل کیے بغیرشادی سے متعلق تحریری فیصلہ جاری کر دیا۔

جسٹس طارق سلیم شیخ نے 11 صفحات پر مشتمل تحریری فیصلہ جاری کیا ، جس میں عدت مکمل کیے بغیر بیوی کی بہن سے شادی کو غیر قانونی قرار دے دیا۔

فیصلے میں کہا گیا کہ عدت سے قبل بیوی کی بہن سے شادی 2 بہنوں کو بیک وقت نکاح میں رکھنے کے مترادف ہے، اسلامی شریعت کےمطابق ایک شخص 2 سگی بہنوں کو بیک وقت نکاح میں نہیں رکھ سکتا۔

عدالت کا کہنا تھا کہ اسلامی فقہ ،وفاقی شرعی عدالت کے فیصلے کے مطابق ایک عورت عدت تک رشتہ ازدواج میں رہے گی، فقہااس بات پرمتفق ہیں ایک شخص پہلی بیوی کی عدت مکمل ہونے سے قبل اسکی بہن سے شادی نہیں کر سکتا۔

عدالتی فیصلے میں کہا گیا کہ کوئی بھی شخص پہلی بیوی کی عدت مکمل ہونے کے بعد اس کی بہن سے شادی کر سکتا ہے،پہلی بیوی کی عدت مکمل ہونے سے پہلے اس کی بہن سے شادی قابل سزا جرم ہے۔

لاہور ہائی کورٹ نے کہا کہ میاں بیوی پر لازم ہے فاسد شادی کےبارے میں معلوم ہوتے ہی جلد علیحدہ ہو جائیں، میاں بیوی ایسی شادی کو ختم نہیں کرتے تو قاضی کی ذمہ داری ہے ان کی شادی ختم کرے، درخواست گزار مصور حسین نے ضمانت قبل از گرفتاری کے لیے رجوع کیا۔

اسلام آباد: ترجمان دفتر خارجہ کا کہنا ہے کہ وزیراعظم شہبازشریف 28 اپریل کو سعودی عرب کا دورہ کریں گے، اس دوران ان کی سعودی ولی عہد محمد بن سلمان سے بھی ملاقات ہوگی۔

تفصیلات کے مطابق ترجمان دفتر خارجہ ممتاز زہرا بلوچ نے میڈیا بریفنگ دیتے ہوئے بتایا وزیراعظم شہبازشریف 28 اپریل کو سعودی عرب کا دورہ کریں گے، دورے کے دوران وزیراعظم شہبازشریف سعودی ولی عہد محمد بن سلمان سے بھی ملاقات کریں گے۔

ترجمان کا کہنا تھا کہ ورلڈاکنامک فورم میں وزیراعظم دیگرممالک کےسربراہان سے بھی ملیں گے، وزیراعظم شہبازشریف مئی میں اوآئی سی اجلاس میں شرکت کیلئے گمیبیا کا دورہ کرینگے۔

ممتاز زہرا بلوچ نے بتائا جی امریکا کی جانب سے گرفتارمبینہ پاکستانیوں تک قونصلر رسائی پر جواب کا انتظار ہے۔

نواز شریف کے دورہ چین کے حوالے سے ترجمان کا کہنا تھا کہ نواز شریف کادورہ چین ذاتی ہے، وزارت خارجہ کسی بھی نجی دورےپر اظہار خیال نہیں کرتی۔

ان کا مزید کہنا تھا کہ پاکستان نےبلاسٹک میزائل پروگرام سےمتعلق امریکی لسٹنگ پر ردعمل دیا ہے اور امریکا کو اپنے تحفظات سے آگاہ کردیا ہے، ایسی لسٹنگ بلا ثبوت اور دہرے معیار کے ساتھ ناقابل قبول ہیں۔