کراچی: ملٹری پولیس پر حملے کا مقدمہ درج کر لیا گیا ہے، فرانزک رپورٹ بھی جاری کر دی گئی ہے، اے آر وائی نیوز نے حملے سے پہلے کی سی سی ٹی وی فٹیج حاصل کر لی ہے جبکہ پولیس نے دہشتگردوں کی گرفتاری کیلئے حکمت عملی طے کرلی۔
کراچی میں فوجی جوانوں پر حملے کی تحقیقات شروع کر دی گئیں ہیں، پولیس دہشتگردوں کی گرفتاری کیلئے متحرک ہوگئی، ایم اےجناح روڈ پردہشت گردوں کی فائرنگ سے فوجی جوانوں کے قتل کا مقدمہ پریڈی تھانے میں درج کر لیا گیا ہے، پولیس کے مطابق ایف آئی آردرج نامعلوم افراد کیخلاف ملٹری پولیس کی مدعیت میں درج کرلی گئی، جس میں قتل اوردہشتگردی کی دفعات شامل ہیں.
اےآروائی نیوز نے ملٹری پولیس پر حملے سے پہلے کی سی سی ٹی وی فوٹیج اور موٹر سائیکل سوار مبینہ حملہ آور کی تصویر حاصل کرلی ہے، سی سی ٹی وی فٹیج میں مبینہ موٹرسائیکل سوارحملہ آوروں کو ملٹری پولیس کی گاڑی کی ریکی کرتے اور اسلحہ لوڈ کرتے ہوئے بھی دیکھا جا سکتا ہے۔
ذرائع کے مطابق حملہ آور کی تصویر اور فوٹیج کی مدد سے دہشتگردوں کی گرفتاری کیلئے ٹارگٹڈ کارروائیاں کی جارہی ہیں جبکہ ابتدائی فرانزک رپورٹ میں انکشافات کیا گیا ہے کہ رینجرز پر فائرنگ میں استعمال نائن ایم ایم سے ملٹر ی پولیس کو نشانہ بنایا گیا۔
رپورٹ کے مطابق ایک ہتھیارکی مشابہت ہوئی، دوسرے سے مختلف اوقات میں سات دیگرقتل بھی ہوئے.
