کانو: نائیجیریا کے شمال مشرقی علاقے میں بوکو حرام کے جنگجوؤں کی فائرنگ سے چوبیس افراد جان کی بازی ہار گئے.
تفصیلات کے مطابق مقامی حکومت کے چیئرمین مائینا اولارمو کا کہنا تھا کہ واقعہ ریاست اڈاماوا کے ٹاؤن گولاک کے ایک گاؤں میں پیش آیا،انہوں نے بتایا کہ حملہ مقامی رہنما کی موت پر ہونے والی سوگ کی تقریب کے موقع پر کیا گیا.
اُن کا کہنا تھا کہ حملہ آور موٹر سائیکلوں پر آئے اور ہجوم پر فائرنگ کردی،جس کے نتیجے میں چوبیس افراد ہلاک ہوئے، جن میں بیشتر خواتین تھیں،حملہ آوروں نے خوراک لوٹی اور گھروں کو آگ لگا دی،یہ ساری کارروائی انھوں نے ایک گھنٹے میں مکمل کی اور اس کے بعد فرار ہوگئے.
ریاست کی پولیس کے ترجمان اوتھمان ابو بکر نے واقعے کی تصدیق کی ہے تاہم انھوں نے ہلاکتوں کی تعداد اٹھارہ بتائی اور دیگر کو زخمی قرار دیا.
واضح رہے کہ اس سے قبل رواں سال نو جنوری کو بوکو حرام نے اڈاماوا کے قریبی علاقے ماڈاگالی میں فائرنگ کرکے سات افراد کو ہلاک جبکہ دو کو زخمی کردیا تھا.
