واشنگٹن : امریکا کے تین اہم سینیٹرز اور ہاؤس ممبر کا دورہ پاکستان کا اعلان کردیا۔
امریکا کے با اثر تین سینیٹرز اور ہاؤس کے رکن آئندہ ہفتے پاکستان کے دورے پر پہنچ رہے ہیں، امریکی ری پبلکن سینیٹرز کے وفد کی قیادت سینیٹر جان مکین کر رہے ہیں ۔
واشنگٹن میں ایک اعلی پاکستانی سفارت کار کے مطابق امریکی ری پبلکن وفد میں سینیٹر جان مکین، سینیٹر لینڈسے گراہم ، سینیٹر
جوڈونیلی اور ہاؤس کے رکن رک ڈیوس شامل ہیں، امریکی وفد پاکستان میں اعلی سول اور فوجی قیادت سے ملاقاتیں کرے گا جبکہ سول ہیومن رائٹس تنظیموں اور دیگر سیاسی جماعتوں کے قائدین سے ملاقاتوں کا اہتمام بھی کیا جارہا ہے۔
پاکستانی سفارت کار کے مطابق امریکی کانگریس میں ری پبلکن پارٹی اس وقت اکثریت میں ہے اور اسی پارٹی نے پاکستان کیلئے کئی امدادی پروگراموں پر روک لگائی۔ پاکستان اس دورے میں ری پبلکن پارٹی کی پاکستان کے حوالے سے غلط فہمیوں کو دور کرنے کی کوشش کرے گا۔
پاکستانی سفارت کار امید کر رہے ہیں کہ اس دورے کے بعد امریکی کانگریس میں پاکستان کے حوالے سے رویے میں نرمی آئے گی۔
پاکستانی سفارتکار نے اےآروائی نیوز سے گفتگو میں بتایا کہ ری پبلکن سینیٹرز اور ہاؤس ممبر کا دورۂ پاکستان اہمیت کا حامل ہے، امریکی وفد کے دورے میں غلط فہمیاں دور کی جائینگی۔
امریکی وفد کا دورہ پاکستانی سفارتکاروں کی کوششوں سے عمل میں آیا۔
