کراچی: عید الفطر کا چاند دیکھنے کے لیے مرکزی رویت ہلال کمیٹی کا اجلاس لاہور میں ہوا جس کی صدارت مفتی منیب الرحمن نے کی،کئی شہروں سے چاند دیکھے جانے کی شہادتیں موصول ہوئیں۔
اجلاس لاہور ہائی کورٹ کے قریب ہوا، یہ اجلاس پندرہ سال بعد ہوا ہے، جس میں مرکزی رویت ہلال کمیٹی کے تمام ممبران نے شرکت کی جبکہ ضلعی رویت ہلال کمیٹیوں کا اجلاس بھی مختلف شہروں میں ہوا جنہوں نے چاند دیکھنےکی شہادتیں جمع کرکے مرکزی کمیٹی دیں۔
محکمہ موسمیات نے کہا تھا کہ عید الفطر کے چاند کی پیدائش ہوچکی ہے ، چاند نظر آنے کا قوی امکان ہے، چاند کی عمر 27 گھنٹے 51منٹ پر محیط ہوگی جسے غروب آفتاب کے بعد 36سے 40 منٹ تک دیکھا جاسکے گا تاہم کراچی میں مطلع ابر آلود ہے اس لیے کراچی میں چاند نظر آنے کا امکان کم ہے۔
اس ضمن میں خیبر پختونخوا کے علمائے کرام کو مرکزی رویت ہلال کمیٹی سے ایک مدت تک شکایت رہی کہ رویت ہلال کےمعاملےمیں ان کی شہادتیں قبول نہیں کی جاتیں تاہم رمضان المبارک کے چاند کے معاملے میں وفاقی وزیر برائے مذہبی امور سردار یوسف کی کاوشوں سے کئی برس بعد رمضان المبارک کا آغاز ایک ساتھ ہوا اور پشاور کی مسجد قاسم خان کے مفتی شہاب الدین پوپلزئی بھی راضی ہوگئے امید ہے اس بار عید بھی ملک بھر میں ایک ساتھ ہوگی۔
واضح رہے کہ سعودی عرب اور متحدہ عرب امارات سمیت خلیجی ریاستوں میں شوال کا چاند دیکھنے کے لیے اجلاس ہوا تاہم سعودی اعلیٰ عدالتی کونسل کو چاند سے متعلق کوئی شہادت موصول نہیں ہوئی جس کے بعد سعودی عرب میں شوال کا چاند نظر نہ آنے کا سرکاری اعلان کردیا گیا، جس کے مطابق سعودی عرب میں عیدالفطر 6 جولائی کو ہوگی۔
