واشنگٹن : امریکا میں پولیس کے ہاتھوں دو سیاہ فام شہریوں کےقتل کےبعدملک بھر میں پولیس مخالف احتجاج میں شدت آگئی.
تفصیلات کے مطابق امریکا میں سیاہ فام افراد کی پولیس کے ہاتھوں ہلاکت پر مختلف ریاستوں میں احتجاجی مظاہرے جاری ہیں،مینیسوٹا کے علاقے سینٹ پال میں رات بھر مظاہرین اور پولیس کے درمیان جھڑپیں جاری رہیں جس کے باعث شہر کی مرکزی شاہراہ پر ٹریفک کی آمدورفت بری طرح متاثر ہوئی.
سینٹ پال میں مظاہرین کی جانب سے پولیس پر پتھراؤ کے علاوہ آتش گیر مواد اور بوتلیں بھی پھینکی گئیں،لوزیانا کے دارالحکومت بیٹن روگ میں احتجاج میں شدت آتی جا رہی ہے اور احتجاج کے دوران مظاہرین نے کئی موقعوں پر پولیس ہیڈکوارٹر کے قریب واقع مرکزی شاہراہ بلاک کر کے ٹریفک کی آمدورفت کو بھی متاثر کیا.
یاد رہےگزشتہ ہفتے مینیسوٹا اور لوزیانا میں پولیس گردی کا نشانہ بننے والے دو سیاہ فام نوجوانوں کی ہلاکت کے سلسلے میں ہونے والے مظاہروں میں اب تک دو سوسے زائد افراد کو گرفتار کیا جاچکا ہے.
