لندن: وہ بچے جو بچپن میں کسی قسم کے کینسر سے نبرد آزما ہوتے ہیں وہ طویل زندگی جیتے ہیں اور مختلف بیماریوں سے بھی محفوظ رہتے ہیں۔
یہ تحقیق برطانیہ میں کی گئی۔ ماہرین کے مطابق وہ بچے جو بچپن میں کسی قسم کے کینسر سے لڑ رہے ہوں اگر انہیں بہترین علاج میسر آسکے تو وہ دیگر افراد کی نسبت ایک صحت مند اور طویل زندگی جیتے ہیں۔
ذہنی تناؤ اور پریشانی کینسر کا سبب *
تحقیق کی سربراہ ڈاکٹر مرنڈا فڈلر کے مطابق بچپن کا کینسر بچوں کی قوت مدافعت میں اضافہ کرتا ہے۔ وہ دیگر افراد کے مقابلے میں بڑھاپے کی عام بیماریوں کا شکار بھی کم ہوتے ہیں۔
تحقیق کے لیے تقریباً 35 ہزار ایسے افراد کا ڈیٹا جمع کیا گیا جو بچپن میں کسی قسم کے کینسر کا شکار رہے تھے۔ ایسے افراد میں دیگر بیماریاں تو کم دیکھی گئیں البتہ ان میں امراض قلب کی شرح زیادہ ریکارڈ کی گئی اور ان میں سے نصف افراد کی موت امراض قلب کے باعث ہی ہوئی۔
کینسر کو شکست دینے والی ماڈل *
ماہرین کے مطابق اس کی وجہ یہ ہوسکتی ہے کہ بچپن میں کیمو تھراپی اور ریڈیو تھراپی نے ان کے دل کے افعال کو سست کردیا ہو اور وقت گزرنے کے ساتھ ساتھ ان کے دل کی کارکردگی کمزور ہوگئی ہو۔
تحقیق میں یہ بھی دیکھا گیا کہ وہ افراد جو ساری زندگی باقاعدگی سے اپنا چیک اپ اور اپنی صحت کا خیال رکھتے رہے ان میں اس کینسر کے پلٹ کر آنے یا کسی دوسرے کینسر کے ہونے کا امکان بھی کم تھا۔
