اسلام آباد : وزیراعظم پاکستان میاں محمد نواز شریف نے کہا ہے کہ پاکستان اور چین گہرے دوست اور ہمسائے ہیں جب کہ پاک چین اقتصادی راہداری نے اس دوستی کو اقتصادی شراکت داری میں تبدیل کر دیا ہے۔
یہ گفتگو وزیر اعظم نواز شریف نے آج چین کی کمیونسٹ پارٹی کی سینٹرل کمیٹی کے وائس منسٹر ژینگ ژیاو سانگ سے ہونے والی ملاقات میں کی۔
وزیراعظم نے کہا کہ پاک چین اقتصادی راہداری پر کام کرنے و الے چینی بھائیوں کے تحفظ کو یقینی بنا رہے ہیں جس کے لیے چینی ورکرز کی سیکیورٹی کےلیے اسپیشل سیکیورٹی ڈویژن تشکیل دے دیا گیا ہے۔
وزیراعظم نواز شریف نے چینی رہنما کو بتایا کہ اسپیشل سیکیورٹی ڈویژن 15 ہزار فوج و سول اہلکاروں پر مشتمل ہے جو پاک چین اقتصادی راہداری پر کام کرنے والے چینی ماہرین اور گذر گاہوں کی حفاظت پر مامور ہے۔
انہوں نے مزید کہا کہ ضرب عضب کی کامیابی کے باعث دہشت گردوں کی کمر ٹوٹ گئی ہے اور دہشت گردوں کے مابین قیام نیٹ ورک بھی توڑ دیا گیا ہے ،دہشت گردوں کے خلاف جنگ کو منطقی انجام تک پہنچانے کا عزم رکھتے ہیں۔
ملاقات کے دوران چین کی کمیونسٹ پارٹی کی سینٹرل کمیٹی کے وائس منسٹر ژینگ ژیاو سانگ نے کہا کہ موجودہ حکومت میں دونوں ملکوں کی دوستی نئی بلندیوں تک پہنچی اور اس سال دو طرفہ تجارت 18 ارب ڈالر کی سطح عبور کر گئی ہے۔
چینی رہنما ژینگ ژیاو سانگ نے وزیراعظم پاکستان کو بتایا کہ آپ پاکستان کے ساتھ ساتھ چین میں بھی کافی مقبول ہیں اور بین الاقوامی رہنماؤں میں چینی افراد سب سے زیادہ آپ کے بارے میں جاننا چاہتے ہیں۔
چینی رہنما نے وزیر اعظم نواز شریف کی پاکستان میں موجود چینی انجینیئرز کی حفاظت کے لیے اٹھائے گئے اقدامات کی تعریف کرتے ہوئے ان کا شکریہ ادا کیا اور پاک چین اقتصادی راہداری منصوبے پر عمل درآمد کی رفتار پر اطمینان کا اظہار بھی کیا۔
