راولپنڈی : آئی ایس پی آر نے لائن آف کنٹرول کی خلاف ورزی اور بھارتی فوجیوں کی لاشوں کی بے حرمتی کے بھارتی الزامات کو مسترد کرتے ہوئے کہا ہے کہ پاک آرمی پیشہ ور فورس ہے جو کسی بھی سپاہی کی بےحرمتی کا سوچ بھی نہیں سکتی۔
ترجمان آئی ایس پی آر نے کہا ہے کہ بھارتی فوجوں کی لاشیں مسخ کرنے کا الزام غلط ہے اور نہ ہی پاک فوج نے لائن آف کنٹرول پر سیز فائرکی کوئی خلاف ورزی کی ہے۔
آئی ایس پی آر کا کہنا تھا کہ پاک فوج انتہائی پیشہ ور فورس ہے اور پاک فوج کسی سپاہی کے ساتھ زیادتی نہیں کرے گی چاہے وہ سپاہی بھارتی فوج سے کیوں نہ تعلق رکھتا ہو اس ضمن میں بھارتی فوجیوں کی لاشوں کی بے حرمتی کا الزام غلط ہے۔
واضح رہے کہ بھارتی میڈیا کی جانب سے پروپیگنڈا کیا جارہا تھا کہ کرشنا گاٹھی سیکٹر میں بھارتی فوجیوں پر راکٹ فائر کیے گئے اور ہلاک ہونے والے دو بھارتی فوجیوں کی لاشوں کو مسخ کیا گیا اور ان کی بے حرمتی کی گئی۔
بھارتی فوج کی جانب سے الزام عائد کیا گیا کہ پاکستان نے لائن آف کنٹرول پر سیز فائر کی خلاف ورزی کرتے ہوئے بھارتی فوج کی گاڑی پر راکٹ فائر کیے جس کے نتیجے میں دو بھارتی فوجی ہلاک ہوئے۔
