جکارتہ : انڈونیشیا نے پاکستان سے کینوکی درآمد پر کوٹہ کی پابندی ختم کردی، سہولت کے فوری اطلاق سے کینو کی برآمد دگنی ہوسکتی ہے۔
تفصیلات کے مطابق انڈونیشیا کے وزیر تجارت اینگارٹیسو لوٹیکا نے پاکستانی کینو کی امپورٹ کے لیے کوٹہ کی پابندی کو ختم کرنے کا اعلان کردیا۔
انڈونیشیا پاکستان بزنس فورم کے اجلاس سے خطاب مین انڈونیشین وزیر تجارت نے پاکستان سے آئندہ سال تک ایک ملین ٹن چاول کی خریداری کے معاہدے پر عمل درآمد کے لیے ایکسپورٹ ٹینڈرز میں آسانی فراہم کرنے کی بھی یقین دہانی کرادی ہے۔
پاکستانی فروٹ ایکسپورٹرز کا کہنا تھا کہ دونوں ملکوں کے درمیان دو سے تین سال میں پاکستان سے انڈونیشیا کو ایکسپورٹ ایک ارب ڈالر تک بڑھائی جاسکتی ہے۔
پاکستان اور انڈونیشیا کے مابین ہونے والے ترجیحی تجارت کے معاہدے میں سوتی دھاگہ اور کپاس شامل نہیں اسی طرح گوشت اور گوشت کی مصنوعات کے لیے سخت ترین قرنطینہ شرائط عائد ہیں، پاکستانی آم کے لیے بھی انڈونیشیا میں پی آر اے کی شرط کی وجہ سے آم ایکسپورٹ نہیں ہو سکتا ہے۔
ایکسپورٹرز کا کہنا تھا کہ پاکستان کی دو کمپنیوں نے نیلامی میں حصہ لے کر 60ہزار ٹن چاول کی ایکسپورٹ کا ٹینڈر حاصل کیا جس سے پاکستان کو 30ملین ڈالر کا زرمبادلہ حاصل ہوتا لیکن اس ٹینڈر میں ڈیلیوری کی مدت مقرر نہیں کی گئی جس کی وجہ سے پاکستان کے لیے اس موقع سے فائدہ اٹھانا ممکن نہیں رہا ۔
