کراچی: صوبہ سندھ بالخصوص شہر قائد کو صاف رکھنے کے لیے محکمہ داخلہ سندھ نے مقررہ مقامات کے علاوہ کچرا پھینکنے پر پابندی عائد کردی، نوٹیفکیشن جاری کر دیا گیا۔
تفصیلات کے مطابق سندھ ہائی کورٹ کے احکامات پر عمل درآمد کرتے ہوئے محکمہ داخلہ سندھ نے مقررہ مقامات کے علاوہ کچرا پھینکنے سے متعلق نوٹیفکیشن جاری کیا۔
ترجمان محکمہ داخلہ کا کہنا ہے کہ بلدیاتی اداروں کے افسران کو پابندی پر عمل درآمد یقینی بنانے کے لیے احکامات جاری کئے جاچکے ہیں جس کے تحت اب مقررہ مقامات کے علاوہ اگر کہیں کچرا دیکھا گیاتو سخت کارروائی کی جائے گی۔
ترجمان کا مزید کہنا تھا کہ صوبے کو صاف رکھنے کے لیے یہ ایک اہم اقدام ہے جس پر عمل درآمد کرنے کے لیے پولیس بھی بلدیاتی افسران کی مدد کرے گی۔
خیال رہے کہ شہرقائد میں تقریباً دو کروڑ سے زائد کی آبادی ہے جہاں یومیہ لگ بھگ 12 ہزار ٹن سے زائد کا کچرا پیدا ہوتا ہے جسے ٹھکانے لگانے کا کوئی موثر نظام موجود نہیں۔
