اسلام آباد: نئے پاکستان کے مشن کا پہلا قدم چند گھنٹوں کی دوری پر رہ گیا، ملک کا اگلا وزیرِ اعظم کون ہوگا؟ اس کا فیصلہ آج ہوجائے گا۔
تفصیلات کے مطابق پی ٹی آئی چیئرمین عمران خان سیاست کی سب سے اہم اننگز میں شہباز شریف کے مد مقابل ہیں، جو موروثی سیاست کی وجہ سے اس نازک موقع پر پارٹی میں فارورڈ بلاک کا سامنا کر رہے ہیں۔
آج قومی اسمبلی کا اجلاس ساڑھے تین بجے شروع ہوگا، اجلاس کا اہم ایجنڈا پانچ سالہ جمہوری مدت کے لیے پاکستان کے اگلے وزیرِ اعظم کا انتخاب ہوگا۔
کپتان کے دس ارکان تجویز کنندہ اور تائید کنندہ بنے ہیں، دوسری طرف لیگی صدر کے نام پر اپوزیشن کا اتحاد پارہ پارہ ہو چکا ہے، پیپلز پارٹی نے شہباز شریف کے لیے تجویز یا تائید کنندہ بننا پسند نہ کیا۔
جماعت اسلامی نے بھی شہباز شریف کو وزارتِ عظمیٰ کے لیے ووٹ نہ دینے کا اعلان کر دیا
سینئرپی پی رہنما خورشید شاہ کہتے ہیں ن لیگ کو تحفظات سے آگاہ کر دیا تھا، کل وزارتِ عظمیٰ کے کسی بھی امیدوار کو ووٹ نہیں دیں گے۔
ادھر جماعت اسلامی اور متحدہ مجلسِ عمل نے بھی شہباز شریف کو ووٹ نہ دینے کا فیصلہ کر لیا ہے، موروثی سیاست کی وجہ سے وزارتِ عظمیٰ کے اکھاڑے میں شہباز شریف اکیلے رہ گئے ہیں۔
