واشنگٹن : امریکا میں پولیس نے مقابلے کے بعد مسلح شخص کو گرفتار کرلیا، فائرنگ کے تبادلے میں 7 پولیس اہلکار زخمی ہوئے، زخمی اہلکاروں میں ایک کی حالت تشویش ناک ہے۔
تفصیلات کے مطابق امریکی ریاست کیرولینا کے جنوبی شہر فلورینس فائرنگ کا واقعہ پیش آیا ہے جس میں مسلح شخص کی فائرنگ کے نتیجے میں 7 پولیس اہلکار زخمی ہوگئے۔
امریکی پولیس کا کہنا ہے کہ فلورینس شہر کی پولیس ہیلپ لائن پر فون کال موصول ہوئی تھی، پولیس پارٹی جائے وقوعہ پر پہنچی تو مسلح ملزم نے بچوں کو یرغمال بنا رکھا تھا اور پولیس مقابلے کے دوران یرغمال بچوں کو ہی ڈھال لیا۔
امریکی میڈیا کا کہنا ہے کہ مسلح شخص اور پولیس ٹیم کے درمیان دو گھنٹے تک شدید فائرنگ کا تبادلہ جاری رہا، گولیوں کی زد میں آکر 7 پولیس اہلکار زخمی ہوگئے جن میں ایک کی حالت تشویش ناک بتائی جارہی ہے۔
مقامی خبر رساں ادارے کے مطابق پولیس اہلکار دو گھنٹے مقابلے کے بعد مسلح شخص کو گرفتار کرنے میں کامیاب ہوگئے تاہم ملزم کی شناخت تاحال نہیں ہوسکی ہے اور نہ ہی حملے کی وجوہات واضح ہیں۔
امریکی صدر ڈونلڈ ٹرمپ نے جنوبی کیرولینا میں ہونے والے پولیس مقابلے کے حوالے سے اپنے ٹویٹ میں کہا ہے کہ ’میری دعائیں فلورینس کاؤنٹی کے پولیس اہلکاروں کے ہمراہ ہیں‘۔
My thoughts and prayers are with the Florence County Sheriff’s Office and the Florence Police Department tonight, in South Carolina. We are forever grateful for what our Law Enforcement Officers do 24/7/365. https://t.co/ZwDmDthItD
— Donald J. Trump (@realDonaldTrump) October 4, 2018
برطانوی خبر رساں ادارے کا کہنا ہے کہ امریکا میں اب تک 23 ہزار 408 امریکی پولیس اہکار ڈیوٹی کے دوران ہلاک ہوئے ہیں جس میں 112 اہلکار وں کو رواں برس فائرنگ کرکے قتل کیا گیا۔
برطانوی میڈیا کے مطابق سنہ 2017 کے دوران متحدہ ہائے امریکا میں 15 ہزار افراد کو فائرنگ کرکے قتل کیا گیا ہے۔
مزید پڑھیں : امریکا: بینک ہیڈکوارٹر میں فائرنگ، 3 افراد ہلاک، دو زخمی
یاد رہے کہ گذشتہ ماہ کے آغاز میں امریکی ریاست اوہائیو کے شہر چنچناٹی میں قائم بینک ہیڈکوارٹر میں گھس کر حملہ آور نے اندھا دھند فائرنگ کے نتیجے تین افراد ہلاک جبکہ 2 زخمی ہوگئے تھے۔
خیال رہے کہ رواں سال جولائی میں امریکی ریاست ٹیکساس کےعلاقے رابزٹاؤن کے نرسنگ ہوم میں نامعلوم حملہ آور نے گھس کر اندھا دھند فائرنگ کردی تھی جس کے نتیجے میں ایک خاتون سمیت 4 افراد جان کی بازی ہار گئے تھے۔
یاد رہے کہ رواں سال 15 فروری کو فلوریڈا کے ہائی اسکول میں 19 سالہ حملہ آور نے اسکول کے اندر گھستے ہی فائرنگ کردی تھی جس کے نتیجے میں 17 افراد ہلاک جبکہ متعدد زخمی ہوگئے تھے۔