واشنگٹن: امریکی نمائندہ خصوصی زلمے خلیل زاد آج بھی پاکستان نہیں پہنچیں گے، امریکی نمائندہ خصوصی آج بھی افغانستان میں مصروف دن گزاریں گے۔
تفصیلات کے مطابق زلمے خلیل زاد نے گزشتہ روز سہ پہر کو پاکستان پہنچنا تھا، تاہم شیڈول میں تبدیلی کے بعد زلمے خلیل زاد کو رات آٹھ بجے اسلام آباد پہنچنا تھا۔
سفارتی ذرائع کا کہنا ہے کہ امریکی سفارت خانے کی جانب سے زلمے خلیل زاد کے چوتھی بار دورے تبدیلی سے متعلق پاکستانی دفتر خارجہ کو آگاہ کردیا ہے۔
پاکستانی دفتر خارجہ کی جانب سے امریکی نمائندہ خصوصی کے چوتھی بار دورے میں تبدیلی پر ناراضگی کا اظہار کیا گیا ہے۔
امریکی سفارت خانے نے زلمے خلیل زاد کے دورے سے متعلق ری شیڈیولنگ جاری کردی، زلمے خلیل زاد کے ہمراہ امریکا کی ڈپٹی وزیر خارجہ الیس ویلز کو بھی پاکستان آنا تھا۔
سفارتی ذرائع کے مطابق امریکی معاون خصوصی لیزا کرٹس پاکستان میں ہی موجود ہیں جو گزشتہ روز پاکستان پہنچی تھیں لیکن لیزا کرٹس کی تاحال دفتر خارجہ سے کوئی ملاقات طے نہیں ہوئی ہے۔
سفارتی ذرائع کا کہنا ہے کہ زلمے خلیل زاد، ڈپٹی وزیر خارجہ الیس ویلز اور لیزا کرٹس کی ایک ساتھ ہی ملاقاتیں ہوں گی۔
زلمے خلیل زاد پاکستان میں وزیر خارجہ شاہ محمود قریشی اور تہمینہ جنجوعہ سمیت دیگر حکومتی اہلکاروں سے ملاقات کریں گے۔
مزید پڑھیں : وزیراعظم عمران خان سے امریکی نمائندہ خصوصی زلمے خلیل زاد کی ملاقات
سفارتی ذرائع کے مطابق زلمے خلیل زاد باقاعدہ طور پروفود کی سطح پر دفتر خارجہ میں مذاکرات کریں گے، ان کے دورے کا مقصد افغانستان میں فوجی انخلا اور افغان طالبان سے بات چیت پرمشاورت ہے۔
خیال رہے کہ دو روز قبل زلمے خلیل زاد نے بیجنگ پہنچنے پر سماجی رابطے کی ویب سائٹ ٹویٹر پراپنے پیغام میں کہا تھا کہ افغان امن عمل میں چین کا کردار اہم ہے، میں یہ جاننے کا منتظر ہوں کہ چین اور امریکا مل کر کس طرح کام کرسکتے ہیں۔
