واشنگٹن: امریکی صدر ڈونلڈ ٹرمپ نے کہا ہے کہ شمالی کوریا کے خلاف پابندیوں میں ریلیف دینے پر غور کیا جارہا ہے۔
غیرملکی خبررساں ادارے کے مطابق امریکی صدر ڈونلڈ ٹرمپ نے اوول آفس میں میڈیا سے گفتگو کرتے ہوئے کہا کہ جنوبی کوریا کے صدر مون جے سے ملاقات میں شمالی کوریا کے سربراہ سے مزید ملاقاتوں کے بارے میں بات کریں گے۔
امریکی صدر نے کہا کہ ملاقات میں شمالی کوریا کے خلاف پابندیوں میں انسانی بنیادوں پر کچھ چھوٹ دینے کی بھی بات ہوگی۔
ڈونلڈ ٹرمپ نے کہا کہ شمالی کوریا کے سربراہ کم جونگ ان کو بہت اچھی طرح جان چکا ہوں وہ بہت قابل احترام ہیں اور یقین ہے کہ آئندہ آنے والوں دنوں میں بہت زبردست کام ہوں گے۔
واضح رہے کہ اس سے پہلے شمالی کوریا کے سربراہ سے امریکی صدر ڈونلڈ ٹرمپ دو ملاقاتیں کرچکے ہیں۔
مزید پڑھیں: شمالی کوریا پر اقتصادی پابندیاں، کم جونگ کی مخالفین کو دھمکی
یاد رہے کہ شمالی کوریا کے سربراہ کم جونگ ان نے مخالفین کو دھمکی دی ہے کہ ان کے ملک پر پابندی لگانے والے ممالک کو بھرپور جواب دیا جائے گا۔
خیال رہے کہ گذشتہ سال ٹرمپ اور اُن کی سنگاپور میں ہونے والی ملاقات میں جزیرہ نما کوریا کو جوہری ہتھیاروں سے پاک کرنے پر اتفاق رائے ہوا تھا بعد ازاں دونوں ممالک کے درمیان تحفظات دیکھے گئے تھے۔
بعد ازاں نیشنل سیکورٹی کے مشیر جان بولٹن نے کہا تھا کہ پچھلے سال جون میں سنگاپور میں جو وعدے کیے گئے تھے، شمالی کوریا کو ابھی ان پر عمل کرنا ہے جس کے لیے دوسری سربراہی ملاقات کی ضرورت ہے۔
