سان فرانسسکو: پیغام رسانی کی سب سے بڑی موبائل ایپلیکشن واٹس ایپ نے صارفین کو سائبر حملوں سے متعلق الرٹ جاری کرتے ہوئے کہا ہے کہ وہ آئی فون اور اینڈرائیڈ کے پلے اسٹور سے ورژن اپ گریڈ کرلیں۔
تفصیلات کے مطابق برطانوی اخبار نے ایک روز خبر شائع کی کہ ہیکر نے واٹس ایپ کے سسٹم تک رسائی حاصل کرلی اور وہ موبائل فونز کی نگرانی کے لیے استعمال ہونے والے سافٹ ویئر کو استعمال کرتے ہوئے واٹس ایپ صارفین کو ہدف بنا رہے ہیں۔
واٹس ایپ کے صارفین کو ہیکرز وائس کال کر کے ہدف بنارہے ہیں، برطانوی اخبار کی رپورٹ کے مطابق جس صارف کو کال کی جاتی ہے اگر وہ اسے ریسیو بھی نہ کرے تو اُس کا کال ڈیٹا سمیت دیگر ڈیٹا ریکارڈ غایب ہورہا ہے۔
مزید پڑھیں: اب واٹس ایپ استعمال کرنے کی فیس دینی ہوگی، کمپنی کی تصدیق
واٹس ایپ کے ترجمان نے سائبر حملوں اور صارفین کا ڈیٹا ہیک ہونے کی تصدیق کرتے ہوئے کہا کہ یہ بات ہمارے لیے حوصلہ افزا ہے کہ صارفین نے مسئلے کو بروقت اجاگر کیا جس کی روشنی میں ہم نے اقدامات کیے۔
انہوں نے ہدایت کی کہ تمام صارفین اپنے واٹس ایپ کو آئی او ایس اور پلے اسٹور سے اپ ڈیٹ کریں ساتھ ہی وہ اگر ان حملوں سے محفوظ رہنا چاہتے ہیں تو آپریٹنگ سسٹم بھی اپ ڈیٹ رکھیں۔
واٹس ایپ ترجمان کے مطابق ہیکرز نے پلے اسٹورز پر جعلی ورژن بھی چھوڑے ہیں لہذا صارفین انہیں کسی بھی صورت استعمال نہ کریں اور آفیشل آئی ڈی سے ہی شیئر کردہ اپ ڈیٹ حاصل کریں، تازہ حملوں میں اینڈرائیڈ صارفین کی بڑی تعداد متاثر ہوئی۔
