اسلام آباد: وزیراعظم عمران خان نے کہا ہے کہ کچھ عناصر غیریقینی کی صورت حال پیدا کرنے کی کوشش کررہے ہیں، معیشت کو درپیش چیلنجز سے نمٹنے کی بھرپور کوشش کررہے ہیں۔
تفصیلات کے مطابق وزیراعظم عمران خان کی زیر صدارت معاشی صورت حال پر اجلاس ہوا جس میں مشیر خزانہ حفیظ شیخ، مشیر تجارت رزاق داؤد اور ملک کے تمام چیمبرز کے نمائندگان نے شرکت کی۔
مشیر خزانہ اور مشیر تجارت نے ملکی مالیاتی معاملات پر وزیراعظم کو بریفنگ دی، اجلاس میں آئی ایم ایف سے مذاکرات سے متعلق معاملات پر تبادلہ خیال کیا گیا۔
اجلاس میں روپے کی قدر میں کمی کی وجوہات پر غور کیا گیا، کاروباری افراد سے مارکیٹ کی تازہ صورت حال پر مشاورت کی گئی، وفد نے معاشی استحکام، معیشت کے فروغ کے لیے تجاویز پیش کیں۔
وزیراعظم عمران خان نے کہا کہ کاروباری برادری اقتصادی استحکام کے لیے کردار ادا کرے، چیلنجز سے نمٹنے کے لیے مشترکہ کوشش کرنا ہوگی۔
عمران خان نے مزید کہا کہ کاروباری برادری سے ملاقاتوں کا سلسلہ تواتر سے جاری رکھیں گے، معاشی بہتری کے لیے کاروباری افراد کی تجاویز پر مشاورت ضروری ہے۔
مزید پڑھیں: ملک کو چلانے کے لئے اسی قوم سے پیسہ اکٹھا کر کے دکھاؤں گا: وزیر اعظم
واضح رہے کہ گزشتہ روز وزیراعظم کا کہنا تھا کہ سرکاری اسپتالوں کو بہتر کرنے کی کوشش کے خلاف ایک مہم چل رہی ہے، کے پی میں کچھ ڈاکٹرز مہم چلا رہے ہیں، سرکاری اسپتالوں کو ٹھیک کرنے کے لئے اصلاحات لا رہے ہیں۔
ان کا کہنا تھا کہ احتجاج سے نہیں ڈریں گے، آپ جتنا بھی دباؤ ڈال لیں، سرکاری اسپتالوں کو ٹھیک کر کے رہیں گے، کسی کی بلیک میلنگ میں نہیں آئیں گے.
