اسلام آباد: سپریم کورٹ آف پاکستان نے فراہمیِ انصاف کے لیے بڑا قدم اٹھاتے ہوئے ای کورٹ سسٹم متعارف کرادیا جس کا باضابطہ آغاز آئندہ ہفتے سے ہوگا۔
سپریم کورٹ کی جانب سے جاری ہونے والے اعلامیے کے مطابق چیف جسٹس آصف سعید کھوسہ کی سربراہی میں تین رکنی بینچ ویڈیو لنک پر پہلی سماعت کراچی رجسٹری میں کرے گا۔
ای کورٹ سسٹم کے تحت وکلاء بذریعہ ویڈیو لنک دلائل دیں گے۔ اعلامیے میں مزید کہا گیا ہے کہ ای کورٹ سسٹم کے ذریعے وکلاء اور سائلین کو کیس کی پیروی میں نہ صرف سہولت ہوگی بلکہ اس اقدام سے وقت اور پیسے دونوں کا ضیاع روکا جاسکتا ہے۔ کراچی رجسٹری میں 27 مئی کو ہونے والی ویڈیو لنک سماعت میں وکلا پرنسپل سیٹ اسلام آباد سے دلائل دیں گے۔
سپریم کورٹ کے جاری کردہ اعلامیہ کے مطابق ای کورٹ سسٹم زیر التوا مقدمات کا بوجھ ختم کرنے میں معاون ثابت ہوگا۔ بیان میں کہا گیا ہے کہ عدالتی تاریخ میں پہلی مرتبہ انفارمیشن کمیونیکیشن ٹیکنالوجی کی مدد سے ای کورٹ کا آغاز کیا جا رہا ہے۔
اعلامیے کے مطابق وکلا اپنا کیس بغیر کسی تاخیر کے پیش کرسکیں گے اور وہ اپنے شہر میں رہتے ہوئے دوسرے شہر میں ہونے والی سماعت پر دلائل بھی دے سکیں گے۔
