اسلام آباد: وزیرمملکت برائے ریونیو حماد اظہر کا کہنا ہے کہ آئندہ مالی سال کا بجٹ عام آدمی کی فلاح وبہبود کے لیے تیار کیا گیا ہے۔
تفصیلات کے مطابق وزیرمملکت برائے ریونیو حماد اظہر نے کہا کہ ٹیکس قوانین پر بلاامتیاز عملدرآمد کیا جائے گا۔
انہوں نے کہا کہ پیپلزپارٹی اور مسلم لیگ ن کے رہنماؤں نے غریب عوام کے ٹیکس کی رقم سے شاہانہ زندگی گزاری۔
حماد اظہر نے کہا کہ ایمنسٹی اسکیم کے ذریعے لوگوں کو اپنے اثاثہ جات ظاہر کرنے کا موقع ملے گا۔ انہوں نے کہا کہ معیشت میں بحران کے باوجود آئندہ مالی سال کا بجٹ عام آدمی کی فلاح وبہبود کے لیے تیار کیا گیا ہے۔
وزیرمملکت برائے ریونیو نے کہا کہ تحریک انصاف کی حکومت شرح نمو، برآمدات، روزگار کے مواقع، ٹیکس کے دائرے، کم ترقی یافتہ علاقوں اور عام آدمی کی آمدنی بہتر بنانے اور کم آمدنی والے افراد کو شیلٹرہومز کی فراہمی پرتوجہ مرکوز کررہی ہے۔
حماد اظہر نے کہا کہ کسی بھی شخص کو جائیداد، ریستوران کی خریداری یا بچت مراکز میں لاکھوں روپے جمع کرانے کی صورت میں اپنے کالے دھن کو چھپانے نہیں دیا جائے گا۔
ایمنسٹی اسکیم کا بنیادی مقصد تمام غیرقانونی اکاؤنٹس کو دستاویزی شکل دینا ہے، حماد اظہر
یاد رہے کہ گزشتہ ماہ وزیر مملکت برائے ریونیو حماد اظہر کا کہنا تھا کہ اثاثے ظاہر کرنے کی اسکیم سے تمام جعلی اکاؤنٹس کے اندراج اور بدعنوانی کے خاتمے کی راہ ہموار ہوگی۔
