سیول: امریکا کے شمالی کوریا کے لیے خصوصی مندوب اسٹیفن بِنگن نے کہا ہے کہ واشنگٹن حکومت پیونگ یانگ کے ساتھ تعمیری مذاکرات کے لیے تیار ہے۔
تفصیلات کے مطابق امریکا نے شمالی کوریا سے مذاکرات کے لیے کوئی پیشگی شرائط بھی نہیں رکھیں، وائٹ ہاؤس کا کہنا تھا کہ تناؤ کے خاتمے کے لیے سنجیدہ ہیں۔
غیر ملکی خبر رساں ادارے کے مطابق امریکی مندوب بِنگن کے بیان کو جنوبی کوریا کی وزارت خارجہ نے جاری کیا ہے، امریکی خصوصی سفیر نے یہ بات اپنے جنوبی کوریائی ہم منصب کے ساتھ ملاقات کے دوران کہی تھی۔
جنوبی کوریائی وزارت خارجہ نے وضاحت کی کہ یہ ملاقات جمعہ کو سیول میں ہوئی، یہ امر اہم ہے کہ رواں برس امریکی صدر ڈونلڈ ٹرمپ اور شمالی کوریائی سپریم لیڈر کم جونگ ان کے درمیان ویتنامی دارالحکومت ہنوئی میں ملاقات بغیر کسی پیش رفت کے ناکام ہو گئی تھی۔
قبل ازیں اسٹیفن بنگن نے اپنے ایک بیان میں کہا تھا کہ شمالی کوریا نے گرم جوشی پر مبنی تعلقات کے لیے اپنا جوہری پروگرام ترک کرنے کی پیشکش کی ہے، تاہم با معنی مذاکرات کے لیے قابل تصدیق اقدامات ضروری ہیں۔
شمالی کوریا تنازعہ، امریکا بغیر کسی شرط کے مذاکرات کے لیے راضی
خیال رہے کہ رواں ماہ کے آغاز میں امریکی صدر کو شمالی کوریا کے رہنما کِم جونگ اُن کی طرف سے ایک نیا ’خوبصورت خط‘ بھی موصول ہوا تھا، جس میں مثبت خیالات کا اظہار اور جوہری پروگرام کے خاتمے کی بات کی گئی تھی۔
