ٹیکساس: امریکی ریاست ٹیکساس کے ایک اسپتال میں دماغ کے آپریشن کے دوران مریضہ ڈاکٹرز سے باتیں کرتی رہی جب کہ اسپتال انتظامیہ نے اس سرجری کو سوشل میڈیا پر براہ راست نشر بھی کیا۔
تفصیلات کے مطابق 25 سالہ امریکی لڑکی کا اسپتال میں ہونے والا دماغ کا آپریشن دنیا بھر میں 1 لاکھ سے زائد سوشل میڈیا صارفین نے براہ راست دیکھا۔
اس پیچیدہ سرجری کے دوران لڑکی اپنے پورے ہوش و ہواس میں تھی اور دوران آپریشن نہ صرف مسکراتی رہی بلکہ ڈاکٹرز سے باتیں بھی کرتی رہی۔
40 منٹ تک جاری رہنے والے اس آپریشن میں ڈاکٹرز نے جننانامی لڑکی کے دماغ سے ’ماس‘ (برین ٹیومر کا سبب بننے والے غیر معمولی خلیے) نکالے۔
میتھوڈسٹ ڈلاس میڈیکل سینٹر میں شعبہ نیورولوجی کی سربراہ ڈاکٹر نمیش پیٹل کا کہنا ہے کہ فالج کی وجہ سے مریضہ کے چلنے کی صلاحیت متاثر ہوئی تھی۔
دوران آپریشن سرجن نے مریضہ سے اس کے پالتو کتے اور اس کی زندگی کے حوالے سے سوالات کیے جس کے جننا نے بغیر کسی ہچکچاہٹ کے جواب دیے۔
مریضہ کا کہنا ہے کہ اس نے آپریشن کو براہ راست نشر کرنے کی اجازت اس لیے دی تاکہ لوگ اس تجربے سے
مستفید ہوسکیں، اسپتال نے سرجری کی لائیو ویڈیو اپنے فیس بک کے آفیشل اکاؤنٹ سے صارفین کو دیکھائی۔
https://www.facebook.com/MethodistDallas/videos/492835578008676/
