اسلام آباد : ملکی زرمبادلہ ذخائر 18ارب12 کروڑڈالر تک جا پہنچے جبکہ اسٹیٹ بینک کے ذخائر 8.23کروڑ ڈالر اضافے کے ساتھ 11.58ارب ڈالر ہیں
تفصیلات کے مطابق اسٹیٹ آف پاکستان کا کہنا ہے کہ ملکی زرمبادلہ ذخائرمیں 3کروڑ85لاکھ ڈالرکااضافہ ہوا اور 10 جنوری تک زرمبادلہ ذخائر18 ارب 12 کروڑ ڈالر ہوگئے۔
اسٹیٹ بینک کے ذخائر 8.23کروڑڈالراضافے سے11.58 ارب ڈالر ہوگئے جبکہ شیڈول بینکوں کے پاس موجود ذخائر 4.35کروڑ ڈالر سے کم ہوکر 6.53ارب ڈالر رہ گئے۔
یاد رہے اسٹیٹ بینک کے ترجمان کا کہنا تھا کہ غیرملکی سرمایہ کاری میں جولائی سے دسمبر کے دوران 68فیصد کا اضافہ ہوا، جس کے بعد جولائی سے دسمبر تک غیر ملکی سرمایہ کاری کا حجم ایک ارب 34کروڑ ڈالر رہا۔
مزید پڑھیں : ملکی معیشت سے متعلق خوش خبری سامنے آگئی
اسٹاک مارکیٹ میں سرمایہ کاری جولائی تا دسمبر 45کروڑ 20لاکھ ڈالر رہی، جبکہ 6 ماہ میں مجموعی سرمایہ کاری کا حجم ایک ارب 80 کروڑ ڈالر رہا، تجزیہ کاروں نے 2020 کو بھی ملکی معیشت کے لیے بہترین سال قرار دیا ہے۔
خیال رہے کہ وفاقی حکومت ملکی معیشت کو مضبوط کرنے کے لیے اہم اقدامات کررہی ہے، آئی ایم ایف سے قرضہ لینے سمیت کئی دوست ممالک بھی پاکستان کی ترقی کے لیے اپنا کردار ادا کررہے ہیں۔
واضح رہے گذشتہ سال دسمبر میں ترجمان اسٹیٹ بینک کا کہنا تھا کہ زر مبادلہ کے ذخائر 8 ماہ کی بلند ترین سطح پر ہیں، ذخائر میں 43 کروڑ 10 لاکھ ڈالر کا اضافہ ہوا، جس کے بعد ملک میں زرمبادلہ ذخائر کا مجموعی حجم 15 ارب 99 کروڑ 32 لاکھ ڈالر ہوگیا۔
