کراچی : سینئر اداکار قوی خان نے ایک گفتگو کے دوران کہا کہ میں اتنے برس بعد آج بھی یہی سوچتا ہوں کہ کام کو مزید بہتر انداز میں کیا جاسکتا تھا، ہر فنکار میں یہی لگن ہونی چاہیے۔
تفصیلات کے مطابق پاکستانی ڈرامہ انڈسٹری کے سینئر اداکار قوی خان نے کہا ہے کہ جب ہم نے کام شروع کیا تو اس وقت صرف ریڈیو اور پی ٹی وی ہوتا تھا لیکن خوش قسمتی سے آج کے نوجوان اداکاروں کو مقبول ہونے کےلئے کئی طرح کے پلیٹ فارم میسر ہیں۔
نجی خبر رساں ادارے سے خصوصی گفتگو کرتے ہوئے ان کا کہنا تھا کہ نئے آنے والے اداکار بڑے باصلاحیت ہیں لیکن انہیں مقبولیت ملنے پر سیکھنے کے عمل کو ہرگز ترک نہیں کرنا چاہیے کیونکہ میں پانچ دہائیوں کے بعد آج بھی خود کوفن کا ایک طالبعلم سمجھتا ہوں۔
نئے اداکار باصلاحیت ہیں لیکن انہیں سیکھنے کا عمل ترک نہیں کرنا چاہیے، قوی خان
قوی خان نے کہا کہ میں نے اپنے دور کے تمام فنکاروں کے ساتھ کام کیا ہے اور میری خوش قسمتی رہی ہے کہ سب ہی فنکار اچھے تھے جن کی یادیں ساتھ ساتھ چلتی ہیں۔
سینئر اداکار نے کہا کہ میں نے فلموں میں بھی کام کیا ہے لیکن اب مجھے اس طرح کا کوئی پراجیکٹ نہیں ملا جس میں میرے مطابق کوئی کردار تخلیق کیا گیا ہو، یہ ہرگز نہیں کہا جا سکتا کہ میں نے فلم انڈسٹری کو چھوڑ دیا۔
انہوں نے کہا کہ آج کل کراچی میں بننے والی ٹی وی ڈرامہ سیریل میں مصروفیات ہیں اور جتنی ہمت ہے اتنا کام کررہا ہوں، اور اتنے سالوں بعد آج بھی یہ سوچتا ہوں کہ میں نے جو کام کیا اسے مزید بہتر انداز میں کیا جا سکتاتھا اور ہر فنکار میں یہی لگن اور جذبہ ہونا چاہیے۔
