بیجنگ : کرونا وائرس سے بچاؤ کیلئے ماسک کی خریدرای خاتون کو مہنگی پڑگئی، جعل سازوں نے تین کروڑ کا چونا لگا دیا،
پولیس نے 5 ملزمان کو گرفتار کرکے مقدمہ درج کرلیا۔
تفصیلات کے مطابق چین کے شہر ژنمی کی رہائشی خاتون کو اس وقت شدید جھٹکا لگا جب اس نے ایک لاکھ 85ہزار پاؤنڈ کے عوض آن لائن منگوائے گئے ماسک کا باکس خالی دیکھا۔
ستائس سالہ گاؤ نامی خاتون سوشل میڈیا پر میک اپ کا سامان فروخت کرتی ہے، چین میں کورونا وائرس کی وبا پھیلنے کے بعد اس نے ماسک فروخت کرنے کا فیصلہ کیا۔
اس سلسلے میں خاتون نے سوشل میڈیا پر ہی ماسک سپلائی کرنے والوں سے ماسک خریدنے کیلئے ایک پیغام جاری کیا، اس دوران ایک خود ساختہ سپلائر نے ان سے رابطہ کیا اور کہا کہ اس کے پاس بہت بڑی تعداد میں ماسک کا ذخیرہ موجود ہے جسے وہ فروخت کرنا چاہتا ہے۔
خاتون نے بات چیت کے بعد سپلائر کے بینک اکاؤنٹ میں1.66 ملین یوآن ( تقریباً 3کروڑ روپے) سے زیادہ ادائیگی کی اور اپنے پارسل کا انتظار کرنا شروع کیا۔
بعد ازاں نو فروری کو جب رائیڈر سے پارسل لینے کے بعد خاتون اسے کھولا تو اس کی آنکھیں کھلی کی کھلی رہ گئیں کیونکہ وہ باکس بالکل خالی تھا۔ اپنے ساتھ ہونے والے اس فراڈ پر خاتون نے فوری طور پر پولیس کو اطلاع کی۔
ژنمی پولیس نے اس معاملے کی تحقیقات کے لئے ایک خصوصی ٹیم تشکیل دی، جس نے فوری کارروائی کرتے ہوئے تیسرے دن ہی 5ملزمان کو گرفتار کرلیا، پولیس نے ملزمان سے رقم بھی برآمد کرلی ہے، کیس کی مزید تفتیش جاری ہے۔
