پاکستانی فلم انڈسٹری کے نام ور اداکار سنتوش کمار کی برسی آج منائی جارہی ہے۔ ان کا انتقال 11 جون 1982 کو ہوا تھا۔
سنتوش کمار کا اصل نام سید موسیٰ رضا تھا۔ انھیں فلمی دنیا اور ان کے مداح ایک باکمال اداکار ہی نہیں بلکہ بااخلاق اور نہایت شائستہ و مہذب انسان کے طور پر بھی یاد کرتے ہیں۔
رومانوی کرداروں کو اپنی اداکاری سے یادگار بنا دینے والے سنتوش کمار نے کئی اداکارائوں کے ساتھ کام کیا، لیکن صبیحہ خانم فلم انڈسٹری کا وہ نام ہیں جن کے آگے سنتوش نے اپنا دل ہار دیا اور وہ رشتہ ازدواج میں منسلک ہوگئے۔
سنتوش کمار نے جہاں فلمی دنیا پر اپنی پرفارمنس سے راج کیا، وہیں اپنے کردار سے ہر دل میں جگہ بنائی اور وہ عزت اور مقام حاصل کیا جو بہت کم اداکاروں کو نصیب ہوا۔
1950 سے 1982 تک انھوں نے 84 فلموں میں اداکاری کی۔ انتقال کے وقت سنتوش کی عمر 56 سال تھی۔
سنتوش کمار کی کام یاب فلموں میں گھونگھٹ، رشتہ، دامن، سیما، سفید خون، بیس دن، آزاد، چنگاری جیسی فلمیں شامل ہیں۔
