ماسکو: روس کے صدر ولادی میر پیوٹن نے کرونا کی وجہ سے ہونے والے معاشی نقصان کو پورا کرنے کے لیے 19 برس بعد امیر طبقے پر ٹیکس بڑھانے کا اعلان کردیا۔
فرانسیسی خبررساں ادارے کی رپورٹ کے مطابق 1روس کے صدر نے اعلان کیا کہ حکومت 19 سال بعد ملک کے امیر طبقے پر ٹیکس بڑھا رہی ہے، جس کے بعد امیر طبقے کو اضافی ٹیکس دینا ہوگا۔
قوم سے بذریعہ ٹی وی خطاب کرتے ہوئے پیوٹن کا کہنا تھا کہ امیر طبقے پر ٹیکس کی شرح کو 13 سے بڑھا کر 15 فیصد کیا جارہا ہے، 73 ہزار سالانہ یا اُس سے زائد کمانے والوں کو دو فیصد اضافی ٹیکس ادا کرنا ہوگا۔
ولادی میر پیوٹن کا کہنا تھا کہ 2001 سے صرف فلیٹ ٹیکس نافذ تھا، اب کرونا کی وجہ سے معاشی زبوں حالی کو استحکام دینے اور معیشت کو بہتر کرنے کے لیے ٹیکسوں میں اضافہ کیا گیا۔
روسی صدر کا کہنا تھا کہ ٹیکسوں سے حاصل ہونے والی اضافی رقوم کو موذی بیماریوں میں مبتلا بچوں کےعلاج اور مہنگی ادویات خریدنے کے لیے استعمال کیاجائے گا۔
روسی صدر نے بیس برس قبل ٹیکس قانون میں تبدیلی کر کے امیروں شہریوں پر عام لوگوںسے زیادہ ٹیکس نافذ کرنے کا اعلان کیا تھا۔
خیال رہے کہ روس میں کرونا وائرس سے اموات کی تعداد 8 ہزار 3 سو سے تجاوز کر گئی۔ روس میں کرونا سے متاثرہ افراد کی تعداد 5 لاکھ 99 ہزار سے بڑھ گئی۔
