ممبئی: بالی ووڈ کے مایہ ناز اداکار امیتابھ بچن کا کرونا ٹیسٹ منفی آگیا جس کے بعد انہیں اسپتال سے گھر منتقل کردیا گیا۔
بھارتی میڈیا رپورٹ کے مطابق امیتابھ بچن ممبئی کے نانا وتی اسپتال میں گیارہ جولائی زیر علاج تھے، ڈاکٹرز نے ایک روز قبل اُن کا کرونا ٹیسٹ کروایا جس کی رپورٹ اب سے کچھ دیر قبل موصول ہوئی۔
ڈاکٹرز نے تصدیق کی کہ امیتابھ بچن نے کرونا کو شکست دے دی جس کے بعد انہیں اسپتال سے گھر منتقل کردیا گیا۔
صحت یابی پر امیتابھ بچن نے مداحوں کے نام پیغام جاری کیا جس میں انہوں نے سب کا شکریہ ادا کرتے ہوئے تصدیق کی کہ میں اسپتال سے گھر منتقل ہوگیا ہوں۔
مزید پڑھیں: امیتابھ بچن اور ابھیشیک بچن کرونا سے متاثر، اسپتال منتقل
یاد رہے کہ بالی ووڈ کے لیجنڈری اداکار امیتابھ بچن اور اُن کے صاحبزادے اببھیشیک بچن کو گیارہ جولائی کو کرونا کی تشخیص ہوئی تھی جس کے بعد انہیں اسپتال منتقل کیا گیا تھا۔
بالی ووڈ انڈسٹری کے 77 سالہ نامور اداکار نے سماجی رابطے کی ویب سائٹ پر ایک ٹویٹ میں کرونا سے متاثر ہونے کی تصدیق کرتے ہوئے بتایا کہ اُن کا کوویڈ 19 ٹیسٹ مثبت آیا ہے جس کے بعد انہیں اسپتال منتقل کیا گیا تھا۔
بھارتی میڈیا رپورٹ کے مطابق ہفتے کی شام امیتابھ بچن کو طبیعت خراب ہونے کے بعد ممبئی کے نانا وتی اسپتال منتقل کیا گیا تھا۔ امیتابھ بچن کے ساتھ اُن کی بہو ایشوریا رائے اور پوتی کا کرونا ٹیسٹ بھی کیا گیا تھا جو مثبت آیا تھا۔
یہ بھی پڑھیں: ایشوریا رائے کی بیٹی کی کرونا رپورٹ آگئی
امیتابھ بچن نے کرونا کی تشخیص کے بعد گزشتہ دس روز میں ملاقات کرنے والوں سے درخواست کی تھی کہ وہ بھی احتیاط کریں اور علامات ظاہر ہونے پر اپنا ٹیسٹ ضرور کروائیں۔
