کراچی: شہر کے مختلف علاقوں میں ڈوب کر 10 افراد جاں بحق ہو گئے۔
تفصیلات کے مطابق شدید بارشوں کے بعد مختلف واقعات میں دس شہریوں کے ڈوب کر جاں بحق ہونے کی اطلاع ہے، ریسکیو ذرایع کا کہنا ہے کہ لیاقت آباد میں سڑک پر گڑھے سے ڈوبی ہوئی لاش نکالی گئی، کورنگی کراسنگ اور ہاکس بے میں بھی ڈوب کر 2 افراد جاں بحق ہوئے۔
کراچی کے علاقے تیموریہ میں نالے سے ڈوبی ہوئی لاش نکالی گئی، پنجاب چورنگی کے قریب انڈر پاس میں ڈوب کر ایک شخص جاں بحق ہو گیا، پولو گراؤنڈ کے قریب سے ڈوبی ہوئی 14 سالہ لڑکے کی لاش جناح اسپتال منتقل کی گئی، گلشن اقبال مدینہ بلیسنگ، رفیق شہید روڈ کے قریب سے 2 لاشیں جناح اسپتال منتقل کی گئیں۔
منظور کالونی میں ڈوبنے والے نوجوان کی لاش نکال لی گئی، جب کہ دوسرے کی تلاش جاری ہے۔
ادھر قیوم آباد میں موٹر سائیکل سوار شہری کرنٹ لگنے سے جاں بحق ہوا۔
یاد رہے کہ کل رات 9 بجے کراچی کے علاقے تھانہ سچل تھانے کی حدود میں 3 افراد برساتی نالے میں ڈوب گئے تھے جن کی تلاش تاحال جاری ہے، ایس ایس پی ایسٹ ساجد سدو زئی نے میڈیا کو بتایا کہ ڈوبنے والے افراد میں باپ بیٹا بھی شامل ہیں، علاقے کا ایک شخص ڈوبنے والے باپ بیٹے کو بچانے گیا تو وہ بھی ڈوب گیا تھا۔
