اسلام آباد: وفاقی وزیر برائے اطلاعات و نشریات شبلی فراز نے اداروں سے نواز شریف کی تقریر کا از خود نوٹس لینے کا مطالبہ کر دیا ہے۔
تفصیلات کے مطابق اپوزیشن جماعتوں کی اے پی سی پر شبلی فراز نے اے آر وائی نیوز سے گفتگو کرتے ہوئے کہا ہے کہ وفاقی دارالحکومت کا ماحول نارمل ہے، صرف ایف 8 کی ایک گلی میں کچھ سیاسی رہنما اکٹھے ہوئے ہیں، نواز شریف نے آج کے بیان میں کوئی نئی بات نہیں کی۔
انھوں نے کہا نواز شریف 2018 میں کیوں نکالا کی مہم میں بھی ایسی باتیں کر چکے ہیں، ان سے پوچھا جانا چاہیے کہ قومی اداروں کے خلاف بیانیہ انھیں کون دے رہا ہے، فیٹف بل کی مخالفت اور اداروں کے خلاف مہم نواز شریف کی تقریر میں ظاہر تھا، اس پر بحث ہونی چاہیے کہ نواز شریف کو بیانیہ کس کی طرف سے دیا جا رہا ہے۔
وزیر اعظم نے نواز شریف کی تقریر نشر کرنے کی اجازت دی
شبلی فراز کا کہنا تھا نواز شریف نے کہا انتخابات کو مینج کیا جاتا رہا ہے، نواز شریف بھول گئے کہ وہ خود 3 بار وزیر اعظم رہے، عمران خان تو پہلی بار وزیر اعظم بنے ہیں، اقتدار میں ہوں تو سب ٹھیک، اپوزیشن میں ہو تو جمہوریت خطرے میں۔
انھوں نے یہ بھی کہا کہ نواز شریف پہلے سے صحت مند اور ہشاش بشاش لگ رہے تھے اور باہر بیٹھ کر ہمارے ملک کے قانون کا منہ چڑا رہے تھے، وہ پاکستان کے خیر خواہ ہیں تو اربوں کی جائیدادیں بیچ کر پاکستان آئیں، منی ٹریل مانگنے کی بجائے خود قانون کے سامنے پیش ہوں، عمران خان نے تو 40 سال کی مکمل منی ٹریل دی ہے، سپریم کورٹ نے عمران خان کو صادق اور امین قرار دیا۔
اے پی سی کو جامع لائحہ عمل تجویز کرنا چاہیے: میاں نواز شریف
شبلی فراز نے کہا کہ نیب کا چیئرمین اپوزیشن کی دونوں جماعتوں نے مل کر لگایا، جب یہ حکومت میں تھے تب نہ نیب کو ختم کیا نہ نیب قوانین تبدیل کیے، اپنے خلاف کیسز بنتے ہی شور شرابا شروع کر دیا، سارا واویلا کرپشن کو پس پشت ڈالنے کے لیے کیا جا رہا ہے، اپوزیشن نے ملک کے ساتھ جو کھلواڑ کیا اس کا خمیازہ آج بھگت رہے ہیں۔
وزیر اطلاعات کا کہنا تھا کہ وزیر اعظم نے خود کہا نواز شریف کی تقریر نشر ہونے دیں، میڈیا آزاد ہے، ہمیں بھی کیا کیا کچھ نہیں کہا جاتا، وزیر اعظم نے واضح ہدایات دیں میڈیا کے خلاف اقدام نہ کریں، نواز شریف کی تقریر براہ راست نشر ہونے سے یہ خود بے نقاب ہوئے، قوم کو پتا چلا ان کی باتوں میں کتنی منافقت ہے۔
انھوں نے مزید کہا نواز شریف مکمل صحت مند دکھائی دیے ہیں، واضح ہو گیا کہ باہر جانے کے لیے بیماری کی شعبدہ بازی کی گئی، اداروں کو نواز شریف کی تقریر کا نوٹس لینا چاہیے۔
