نئی دہلی: بھارتی ریاست مغربی بنگال میں میڈیکل اسٹور میں ہونے والے دھماکے نے علاقے میں سنسنی پھیلادی ہے۔
بین الاقوامی خبر رساں ایجنسی کے مطابق مغربی بنگال کے علاقے کمرہٹی میں ایک میڈیکل اسٹور میں رکھے لاوارث بیگ میں دھماکا ہوا، دھماکے میں کسی قسم کا جانی نقصان نہیں ہوا۔
ذرائع کے مطابق واقعے سے قبل ذاکر حسین نامی تاجر کے پاس کے نامعلوم فون کالز کے زریعے دس لاکھ روپے بھتہ دینے کا کہا گیا تھا، جس پر تاجر نے مقامی پولیس اسٹیشن میں رپورٹ بھی درج کرائی تھی۔
یہ بھی پڑھیں: نئی دہلی میں بیوی کے سامنے شوہر قتل
اسلام علی خان نامی تاجر کا کہنا تھا کہ ایک شخص دوا خریدنے کے لئے میڈیکل اسٹور میں آیا تھا، پیسے کم پڑنے پر اس شخص نے دکاندار سے کہا کہ بیگ رکھ لوں، میں پیسے لے کر آتا ہوں، اس شخص کے میڈیکل اسٹور سے نکلتے ہی دھماکا ہوا، دھماکے کی تمام سی سی ٹی وی فوٹیج میڈیکل اسٹور میں لگے کیمرے نے محفوظ کرلی ہے۔
مقامی پولیس کا کہنا ہے کہ دھماکا میڈیکل اسٹور میں کیوں ہوا اور اس کے مقاصد کیا تھے؟ ان سوالات کا جواب جاننے کے لئے تحقیقات کا آغاز کردیا گیا ہے، اور جلد ہی میڈیکل اسٹور میں بیگ رکھنے والے شخص کو جلد ہی ڈھونڈ نکالا جائے گا۔
